Удальцоў: Абвінавачванне ў масавых непарадках, якіх не было, - абсурд

Каардынатар "Левага фронту", расейскі апазіцыянер Сяргей Удальцоў выступіў з апошнім словам у судзе.

Масгарсуд, які разглядае справу аб арганізацыі масавых непарадкаў, 8 ліпеня заслухаў апошняе слова падсудных - каардынатара "Левага фронту" Сяргея Удальцова і памочніка дэпутата Дзярждумы Леаніда Развазжаева, якіх дзяржабвінавачанне запатрабавала прысудзіць да васьмі гадоў калоніі агульнага рэжыму для кожнага, піша NEWSru.com.

"Прызнаваць віну, калі ты не ўчыняў злачынства - гэта просты шлях да ганьбы. У гэтым я перакананы, і ісці гэтым шляхам не меруся", - сказаў, звяртаючыся да суду, Удальцоў. Разам з тым, адзначае ІТАР-ТАСС, ён выказаў спадзяванне, што суд здолее бесстаронне прааналізаваць усе довады і пераканацца, што ў грунце крымінальнай справы ляжаць правакацыі і фальсіфікацыі.

Удальцоў падкрэсліў, што не ўчыняў інкрымінаванага яму злачынства. Гэта, на ягоную думку, было даведзена падчас судовага следства. "Абвінавачванне Удальцова ў арганізацыі масавых непарадкаў з'яўляецца абсурдным у сувязі з адсутнасцю самога факту масавых непарадкаў", - заявіў ён.

У "Твітэры" "Камітэта 6 траўня" гаворыцца, што Удальцоў назваў падзеі 6 траўня не масавымі непарадкамі, а "правакацыяй улад з наступным разгонам мірнай дэманстрацыі". На ягоную думку, не было прыкмет злачынства, прадугледжанага арт.212 КК РФ - падпалаў, пагромаў, знішчэння маёмасці, ужывання зброі і выбуховых рэчываў. "Тыповая выява масавых непарадкаў - калі натоўп б'е вітрыны, перакульвае, падпальвае самаходы. 6 траўня такога не было", - намагае Удальцоў.

Ён нагадаў, што на пададзеных абвінавачваннем відэазапісах большасць пацярпелых - гэта "збітыя і скрываўленыя" цывільія асобы, з якіх ні адна не было прызнаная пацярпелай, тады як "пацярпелыя" супрацоўнікі паліцыі мелі збольшага драпіны, сінякі ды іншыя лёгкія пашкоджанні або наогул ніякіх.

"Нават Лебедзеў, што ўклаў угоду са следствам, сказаў у судзе, што масавыя непарадкі не рыхтаваліся. Тым больш, іх наогул не было", - нагадаў Удальцоў, адзначыўшы, што трэці фігурант справы, Канстанцін Лебедзеў, пайшоў на ўгоду са следствам і даў прызнальныя сведчанні "фактычна пад прымусам, у абмен на змякчэнне пакарання". "Ён ужо на волі, а нам запыталі па восем гадоў", - дадаў каардынатар "Левага фронту".

Сяргей Удальцоў таксама звярнуў увагу суда на тое, што зыходных відэафайлаў, які леглі ў падмурак фільма "Анатомія пратэсту-2", не існуе, іх "з невядомай прычыны цалкам знішчылі пасля выхаду фільма". Такiм самым чынам аўдыёзапісы Лебедзева, якія былі зробленыя на невядомым дыктафоне, згубленыя. "Калі паводле публікацыяй" жоўтай прэсы", якой цяпер з'яўляецца НТВ, саджаць людзей, гэта будзе, так бы мовіць, граніца дасканаласці", - адзначыў Удальцоў.

Выступаючы з апошнім словам, Удальцоў таксама зняпраўдзіў абвінавачванні ў атрыманні грошай ад грузінскага палітыка Гіві Таргамадзэ. "Грунтуючыся на прэзумпцыі невінаватасці, хачу спытаць у стараны абвінавачання - дзе тыя грошы, пра якія яны кажуць? Дзе грошы?" - спытаў ён.

Таксама Удальцоў адзначыў, што ў аргкамітэт правядзення мітынгу 6 траўня ўваходзілі людзі самых розных поглядаў. "Ці мог я сказаць Акуніну: ідзі на Балотную, стаўчы пару паліцыянтаў?" - задаўся пытаннем падсудны. Паводле ягоных слоў, абвінавачванне ўключыла ў склад злачынства арганізатараў узгодненага мітынгу, і адзначыў, што абвінавачванне ўважае кожны мітынг за спробу арганізаваць масавыя непарадкі, а кожную сустрэчу або сэмінар - як падрыхтоўку да іх.

Удальцоў заклікаў суд задацца пытаннем, хто выклаў на сайце ГУУС няправільную схему арганізацыі мітынгу, а затым прыбраў яе, і паспрабаваць адказаць, ці мог зрабіць гэта Таргамадзэ ці ён самі на загад Таргамадзэ.

Выступ Сяргея Удальцова доўжыўся больш за паўтары гадзіны, адзначаецца ў "Твітэры", які вядзецца ад ягонага імя. Суддзя-старшыня папярэдзіў, што дзеля занадта працяглай прамовы час, адведзены для выступу чацвярых адвакатаў, будзе зменшаны.

Як адзначалася ў публікацыях расейскіх СМІ, прысвечаных гучнай справе, такі тэрмін пазбаўлення волі эквівалентны пакаранню, прадугледжанаму для наркадылераў і разбойнікаў. Самыя яскравыя цытаты падае ў сваім аглядзе сайт "Заголовки".

Як чакаецца, пасля заключных слоў адвакатаў Удальцова суд выйдзе ў дарадчы пакой для вынясення прысуду. Нагадаем, крымінальная справа ў дачыненні да Удальцова і Развазжаева была распачатая пасля праверкі інфармацыі, выкладзенай у фільме НТВ "Анатомія пратэсту-2", дзе быў прадэманстраваны запіс сустрэчы расейскіх апазіцыянераў з грузінскім палітыкам Гіві Таргамадзэ. На іх, як мяркуе абвінавачванне, абмяркоўваліся планы арганізацыі масавых непарадкаў. Зняволены пад хатні арышт Удальцоў і змешчаны пад варту Развазжаеў адмаўляюцца прызнаваць сваю віну.

Лебедзеў, што раней пайшоў на ўгоду са следствам, даў прызнальныя сведчанні, што звінавачваюць Удальцова і Развазжаева, і выступіў ключавым сведкам абвінавачвання на працэсе супраць былых паплечнікаў. Ён атрымаў 2,5 гады калоніі, але нават не быў адпраўлены туды - яго трымалі ў адным са сталічных слндчых ізалятараў, тлумачачы гэта патрэбай ягонага ўдзелу ў следчых дзеяннях і ў судзе над Удальцовым і Развазжаевым. У траўні ён быў вызвалены ўмоўна-датэрмінова.

8 ліпеня адвакат Развазжаева Дзмітрый Аграноўскі паведаміў РАСПИ, што Еўрапейскі суд правоў чалавека камунікаваў скаргу ягонага падабароннага ў сувязі з ягоным выкраданнем і незаконнай дастаўкай у Расею. ЕСПЧ, са слоў адваката, ужо звярнуўся да ўрадаў Расеі і Украіны з патрабаваннем даць тлумачэнні. Маскву просяць адказаць на 18 пытанняў, а Кіеў - на дзевяць. У Страсбургу чакаюць адказаў да 15 верасня.

Напярэдадні стала вядома, што Канстытуцыйны суд РФ адмовіўся разглядаць скаргу Леаніда Развазжаева з нагоды ўгоды з правасуддзем. Развазжаеў прасіў КС праверыць на адпаведнасць канстытуцыі раздзел 40.1 Крымінальна-працэсуальнага кодэкса РФ, якая тычыцца так званай угоды з правасуддзем. Заяўнік мяркуе, што яна неканстытуцыйная ў той частцы, якая дазваляе выносіць прысуд у дачыненні да абвінавачанага, які ўклаў дасудовае пагадненне аб супрацоўніцтве, перш чым будуць асуджаныя іншыя фігуранты, што такое пагадненне не ўклалі.

Канстытуцыйны суд накіраваў паведамленне заяўніку аб неадпаведнасці звароту патрабаванням закона "Аб Канстытуцыйным судзе РФ".