Міністэрства аховы здароўя рыхтуе масавае адкліканне медыцынскіх ліцэнзій

У Беларусі імкліва павялічыцца колькасць кампаній, якія будуць залічаныя да арганізацый аховы здароўя.

Гэта адбудзецца ў сувязі са зменамі ў Закон «Аб ахове здароўя», якія ўвойдуць у дзеянне 26 снежня 2014. Многія з кампаній не гатовыя да такога павароту падзей, піша «Ежедневник».

Як заявіў старшыня Рады заснавальнікаў СТАА «Экамедсэрвіс», чалец Грамадска-кансультацыйнай рады Міністэрства аховы здароўя Уладзімір Каява, менавіта ў сувязі з унясеннем змен у Закон «Аб ахове здароўя» з пачатку 2015 у Беларусі можа адбыцца масавае адкліканне ліцэнзій на правядзенне розных відаў медыцынскай дзейнасці беларускіх кампаній.

Згодна з артыкулам 1 Закона, арганізацыя аховы здароўя - юрыдычная асоба, асноўнай мэтай дзейнасці якой з'яўляецца выкананне медыцынскай і (або) фармацэўтычнай дзейнасці. У сувязі з тым, што існая ў Законе фармулёўка не ахоплівае ўсе юрыдычныя асобы, якія выконваюць медыцынскія паслугі, гэта спараджае нявызначанасць статусу юрыдычнай асобы, яе кампетэнцыі і паўнамоцтваў. Менавіта ў сувязі з гэтым у «палату прадстаўнікоў» быў падрыхтаваны і накіраваны ліст аб унясенні змяненняў у Закон у частцы вызначэння арганізацыі аховы здароўя.

Сутнасць прапановы, якую ініцыяваў Уладзімір Каява, палягае ў тым, каб арганізацыяй аховы здароўя прызнавалася «юрыдычная асоба, асноўным відам дзейнасці якой з'яўляецца правядзенне медыцынскай, фармацэўтычнай дзейнасці». Многім беларускім кампаніям Беларусі, якія выконваюць медыцынскія паслугі было прасцей не называцца арганізацыяй аховы здароўя, бо ў гэтым выпадку не патрабавалася выконваць шэраг абавязковых патрабаванняў, якія ўсталёўваліся Законам. У выніку не толькі скажалася статыстыка таго, колькі ў краіне рэальна працуе арганізацый аховы здароўя, але і ствараліся няроўныя ўмовы для працы і канкурэнцыі.

"Дэпутаты" пайшлі насустрач ініцыятыве Каявы, у выніку чаго 16 чэрвеня былі прынятыя адпаведныя змены ў Закон «Аб ахове здароўя», які ўвойдзе ў дзеянне 26 снежня 2014 года. З гэтай даты ўсе кампаніі, асноўным відам дзейнасці якіх з'яўляецца правядзенне медыцынскай або фармацэўтычнай дзейнасцi, будуць разглядацца як арганізацыі аховы здароўя. Яны павінны будуць цалкам выконваць усталяваны Міністэрствам аховы здароўя парадак дзейнасці такіх арганізацый і іх наменклатуру. Гэта ў першую чаргу тычыцца назвы такіх арганізацый і таго, хто можа імі кіраваць.

Згодна з папярэднім аналізам, з уваходжаннем у дзеянне змяненняў у Закон, практычна ўсе камерцыйныя арганізацыі, якія маюць медыцынскія цэнтры, будуць арганізацыямі аховы здароўя. Пры гэтым пераважнай большасці з іх давядзецца не толькі мяняць назву ў адпаведнасці з патрабаваннем Міністэрства аховы здароўя, але і змяняць кіраўнікоў. Адны кампаніі да гэтага проста не гатовыя, іншыя нават не ведаюць, што іх чакае. Пры гэтым Міністэрства аховы здароўя не робіць ніякіх захадаў, каб паведаміць будучым арганізацыям аховы здароўя, што з 26 снежня 2014 года ім давядзецца працаваць у новых умовах.

«Мяркуем, што Міністэрства аховы здароўя павінна загадзя правесці аналіз ды інфармаванне новых арганізацый аховы здароўя, можна і праз СМІ, пра змену назвы і кіраўніка арганізацыі ў адпаведнасці з законам аб «Ахове здароўя» і указа №450. Каб потым не было масавага пазбаўлення ліцэнзіі, як гэта было ў 2005 годзе, калі ў адзін момант былі пазбаўленыя ліцэнзіі некалькі дзесяткаў арганізацый», - заяўляюць у «Экамедсэрвісе».