«Хор Турэцкага» ў Віцебску праспяваў песню ў падтрымку Украіны

8 ліпеня ў Віцебску прайшоў першы начны канцэрт «Славянскага базару-2014».

У Летнім амфітэатры пры аншлагу адбылося выступленне арт-групы «Хор Турэцкага», пішуць «Народныя навіны Віцебска».

Традыцыйна калектыў пачаў свой выступ папуры з класічных оперных твораў. Пры гэтым нечакана завяршыў оперную частку выкананнем каталіцкага рэспансорыя X стагоддзя «Libera Me, Domine».

Затым артысты заявілі, што светам кіруе голад і любоў і прыпісалі, невядома навошта, словы Шылера «Капіталу» Карла Маркса. Прычым рыторыка вядучага стала такой, што здалося, быццам на сцэну Летняга амфітэатра прабраўся апальны Міхалок з «Ляпіса Трубяцкога». Але затым наступіла выкананне «Money, Money, Money» ABBA, а не чагосьці з рэпертуару беларускай рок-групы.

Затым хор прысвяціў будаўнікам Віцебска і «стваральнікам горадаўтваральных прадпрыемстваў» песню (расейскую версію) з кінафільма «Генералы пяшчаных кар'ераў» - «Я пачаў жыць у трушчобах гарадскіх».

Пасля гэтага публіка разам з артыстамі ў рытме маршу выканала «І зноў працягваецца бой» (музыка А. Пахмутавай, словы Н. Дабранравава). Пад словы пра маладога Леніна сцэна амфітэатра ператварылася ў кумачовы маўзалей, па якім лёталі камсамольскія значкі.

Адышоўшы ад савецкай тэматыкі, артысты ўспомнілі аб сваіх гастролях ва Украіне, калі на іх вачах вяршылася найноўшая гісторыя. Таму яны наважылі праспяваць песню на ўкраінскай мове і выканалі твор Андрэя Малышкі «пісня пра ручнік». На кулісах сцэны ў гэты час з'явіліся колеры нацыянальнага сцяга Украіны і ўзоры ўкраінскіх ручнікоў і вышыванак. Скончыўшы песню, «Хор Турэцкага» пажадаў Украіне шчасця і росквіту на доўгія стагоддзі.