Жыхары вуліцы Васняцова ў Менску пратэстуюць супраць ушчыльнення

Жыхары Заводскага раёна сталіцы змагаюцца супраць будаўніцтва двух 19-павярховых жылых дамоў на скрыжаванні вуліц Васняцова і Пляханава.

Пра гэта паведаміў старшыня аргкамітэта ў стварэнні грамадзянскай ініцыятывы «Еўраперспектыва» Віктар Янчурэвіч. Ён адзначыў, што забудову гэтай тэрыторыі з 2012 года праводзіць ІЧУСП «Атлант-М Лад» і, «як высветлілася, з парушэннем праекта дэталёвага планавання і горадабудаўнічых нормаў», піша БелаПАН.

Праектам дэталёвага планавання ад 28 жніўня 2008 г №1966 прадугледжана будаўніцтва на гэтай тэрыторыі двух дзевяціпавярховых жылых дамоў на 48 кватэр кожны з убудаванымі памяшканнямі ўніверсальнага прызначэння і гаражамі згодна з колькасцю кватэр.

Аднак без карэктавання дэталёвага плана і грамадскага абмеркавання камітэтам архітэктуры і горадабудаўніцтва Менгарвыканкама ўзгодненае будаўніцтва двух 19-павярховых жылых дамоў па 133 кватэры кожны. Праект прайшоў дзяржаўную экспертызу, забудоўшчыку выдадзена дазвольная дакументацыя на будаўніцтва. На сёння заканчваецца будаўніцтва першага 19-павярховага дома, пачатае будаўніцтва другога.

«Мясцовыя жыхары занепакоіліся, калі выявілі, што вышыня будаванага дома стала перавышаць прапісаныя дэталёвым планам дзевяць паверхаў, і ўвязаліся ў перапіску з дзяржаўнымі органамі, каб спыніць незаконнае будаўніцтва. Былі накіраваныя калектыўныя скаргі ў адміністрацыю Заводскага раёна, Менгарвыканкам, пракуратуру Менска, Камітэт дзяржаўнага кантролю і іншыя інстанцыі. Пад зваротамі падпісалася больш за 200 жыхароў раёна. У выніку праверак факты парушэння дзейнага заканадаўства былі пацверджаныя», - сказаў Янчурэвіч.

Так, пракуратура Менска на ліст жыхароў паведаміла: «Падчас правядзення праверкі пракуратура ўстанавіла, што пры распрацоўцы праектнай дакументацыі на паказаным аб'екце, яе разглядзе і ўзгадненні парушаныя горадабудаўнічыя нормы, рэгламенты генеральнага плана горада Менска, параметры горадабудаўнічага праекта дэталёвага планавання тэрыторыі ў межах вуліца Васняцова - вуліца Тухачэўскага - канал Сляпянскай воднай сістэмы».

Менгарвыканкам пастанавіў прыпыніць будаўніча-мантажныя работы з другой чаргой будаўніцтва, а таксама прыпыніць дзеянне высноў, выдадзеных ІЧУСП «Атлант-М Буд» для 2-й чаргі будаўніцтва, да зацвярджэння карэктавання дэталёвага плана, якім будуць вызначаныя параметры асваення тэрыторыі.

«Аднак будаўніцтва другой чаргі на сёння не спыняецца. І жыхары асцерагаюцца, што легалізацыя ўжо пабудаванага 19-павярховіка выльецца ўразаннем тэрыторыі ландшафтна-рэкрэацыйнай зоны Сляпянскай воднай сістэмы і руйнаваннем прылеглага прыватнага сектара, невыкананнем стандартаў жылога асяроддзя і парушэннем правоў на спрыяльнае асяроддзе пражывання. А будаўніцтва другога дома канчаткова пагоршыць сітуацыю», - паведаміў Янчурэвіч.

З ягоных слоў, «у арсенале жыхароў пасёлка Заходні маецца яшчэ шэраг нявыкарыстаных магчымасцяў для прыцягнення ўвагі да сваёй праблемы і да пытання безадказнасці чыноўнікаў, якія дапускаюць грубыя парушэнні дзейнага заканадаўства». «Выказваю надзею, што праваахоўныя і кантралюючыя структуры гэтую праблему ўбачылі і зробяць захады да ліквідацыі дапушчаных парушэнняў і прыцягнення да адказнасці вінаватых службовых асоб, а тыя магчымасці застануцца незапатрабаванымі. Адказнасць і дакладнае выкананне заканадаўства павінны стаць нормай горадабудаўніцтва», - мяркуе актывіст.