Камандзір узвода батальёна «Айдар»: Не бачу падстаў для поспеху перамоў у Менску

Ва Украіны няма прычын згаджацца на той варыянт, на які пайшлі Малдова ў Прыднястроўі, Грузія ў Абхазіі і Паўднёвай Асеціі.

Пра гэта заявіў Яўгеній Дзікі, палітолаг Міжнароднага інстытута дэмакратыі (Кіеў), цяпер - камандзір узвода Добраахвотніцкага батальёна «Айдар», што ваюе на баку ўкраінскіх уладаў, у каментары БелаПАН.

«Як байцу «Айдара», як кожнаму байцу, які кожны дзень губляе сваіх таварышаў, мне б вельмі хацелася верыць у поспех гэтых перамоваў і што вайна хутка скончыцца, - адзначыў ён. - Але, шчыра кажучы, я не бачу падставаў спадзявацца на поспех гэтых перамоваў. З ваеннага пункту гледжання, Украіна перамагае, калі Расея не кіне ў бой свае рэгулярныя часткі. Прарасейскія добраахвотнікі, нават узмоцненыя расейскімі вайскоўцамі і кадравымі інструктарамі, супраць нашага рэгулярнага войска - гэта пытанне ад месяца да двух, мы іх даціскаем».

У такой сітуацыі ва Украіны няма падстаў згаджацца на той варыянт, на які пагадзілася Малдова ў Прыднястроўе, Грузія ў Абхазіі і Паўднёвай Асеціі, мяркуе палітолаг.

«У той жа час не вызначаная кардынальная праблема: няма такога механізму, пры якім мы можам перамагчы, а Пуцін - захаваць твар, - сказаў ён. - Калі б такі механізм быў кімсьці знойдзены, то гэтая вайна адразу б скончылася. Але паколькі цяпер Пуцін зрабіў на гэтую вайну занадта вялікую стаўку і нашая перамога для яго азначае страту асобы з далёка ідучымі наступствамі ўнутры самой Расеі, у гэтай сітуацыі я не бачу падстаў спадзявацца на поспех мірных перамоў бліжэйшымі днямі. Праз месяц-паўтара - дай бог, але цяпер наўрад ці».

Нагадаем, 26 жніўня ў Менску адбудзецца сустрэча ў фармаце Украіна - ЕЗ - «Еўразійская тройка».