У Менску гарэў цэх «Камунаркі»
7- 20.08.2014, 10:40
- 8,539
Узгаранне адбылося ў цэху для пражання арэхаў.
Пра гэта паведамілі charter97.org у прэс-службе МНС.
«19 жніўня а 13 гадзіне ў цэнтры аператыўнай управы Менскай гарадской службы МНС з пасады аховы прадпрыемства паступіла паведамленне аб загаранні ў цэху пражання арэхаў супольнага адкрытага акцыянернага таварыства «Камунарка».
Калі да месца выкліку прыбыло падраздзяленне МНС, паводле вонкавых прыкмет назіраўся дым слабой канцэнтрацыі.
Падчас выведкі было ўстаноўлена, што ў цэху для пражання арэхаў (гэта аднапавярховы цагляны будынак, вышынёй 6,5 метраў) адбылося загаранне адкладанняў у апараце пражання «Конці-303», 1976 года выпуску. Плошча загарання адкладанняў склала амаль 4 м2. На тушэнне і абарону падаваліся 2 ствалы «Працёк», цыстэрны ўсталявалі на пажарныя гідранты. Пацярпелых няма, эвакуацыя не праводзілася. Тэхналагічны працэс не парушаны», - паведамілі там.
Прычына інцыдэнту - высвятляюцца. Меркаваная версія - парушэнне тэхналагічнага працэсу (несвоечасовая ачыстка адкладанняў у апараце пражання).
Фота: МНС