Бум «галоднага турызму» ў Расеі: пецярбуржцы едуць за ежай у Фінляндыю

У Расеі рэзка набірае абароты новы від турызму - прадуктовы.

Хутчэй за ўсё гэта з'ява прагрэсуе ў памежных фінскіх гарадах: расейскіх «турыстаў» з Пецярбурга туды завозяць аўтобусамі, і ў апошнія дні іх стала амаль у паўтара разы больш, піша «Фонтанка», спасылаючыся на мясцовую прэсу. Расейцы скупляюць фінскія прадукты, якія падпалі пад санкцыі, оптам - скрынкамі і пакункамі. Але тут важна прытрымлівацца абмежаванняў: на тыдні мытнікі затрымалі грамадзяніна, які пажадаў завезці ў краіну 70 кг забароненага паштэту. Чыноўнікі нагадалі: увозіць прадукты можна, але толькі для асабістых патрэб, гэта значыць не больш за 5 кг.

Асартымент прадуктаў, прызначаных для экспарту ў Расею, але не вывезеных праз эмбарга, пашыраецца і ў сеткавых крамах ва ўсёй Фінляндыі, у асноўным, гэта малочная прадукцыя. Прадукты з расейскай этыкеткай прадаюць са значнай зніжкай, часам - вымушанай. Напрыклад, фіны аддаюць перавагу салёнаму сметанковаму маслу, а «звычайнае», не даехаўшае да Расеі, купляюць у асноўным для выпечкі. Купляючы капеечны сыр, дзякуюць Пуціну за нечаканыя зніжкі.

У памежным горадзе Лапеенрантэ з крамы K-Citymarket прадукты выносяць скрынкамі, крама наняла дадатковых супрацоўнікаў для працы ў прадуктовым аддзеле і на касах.

«Галодных» турыстаў з Расеі стала амаль у паўтара разы больш: на паркоўцы супермаркета Prisma ў гэтым памежным горадзе раніцай 21 жніўня замест звычайных 10 стаяла 16 аўтобусаў з Расеі. Дырэктар крамы Рыста Пункінен паведаміў, што за мінулы тыдзень продажы з афармленнем «такс-фры» (гэта значыць для вывазу за мяжу) выраслі на 25% у параўнанні з аналагічным перыядам мінулага года.

Акрамя масла і сыроў, яшчэ адзін папулярны тавар - безлактознае малако кампаніі Valio, якое выкарыстоўваюць для харчавання дзяцей з алергіяй на лактозу. Забарона стварыла праблемы для многіх бацькоў, і ў сераду ўрад вывеў рэдкі прадукт з-пад санкцый. Кіраўнік расейскага падраздзялення Valio Міка Коскінен паведаміў ІТАР-ТАСС, што пастаўкі безлактознага малака ў Расею адновяцца ў панядзелак, завязуць малако галоўным чынам у Маскву і Пецярбург.

Урад Расеі забараніў імпарт мяса, малочнай прадукцыі, гародніны, карняплодаў, садавіны, арэхаў, рыбы, морапрадуктаў і каўбас з ЗША, Еўразвяза, Канады, Аўстраліі і Нарвегіі. Санкцыі не тычацца тавараў дзіцячага харчавання і алкагольнай прадукцыі. Эмбарга было ўведзенае ў якасці адказу на санкцыі, абвешчаныя краінамі Захаду пасля далучэння Крыму да Расеі.