Менск Кучука супраць Віцебска Кандрацьева

Сімвалічныя зборныя абласцей Беларусі.

Пакуль каманды вышэйшай лігі рыхтуюцца да хуткага старту другога этапу чэмпіянату краіны, «Прессбол» фантазіруе на тэму, як выглядалі б зборныя сямі галоўных рэгіёнаў Беларусі.

Прынцып камплектавання зборных абсалютна просты. Журналісты сабралі інфармацыю аб тым, дзе нарадзіліся гульцы вышэйшай і першай лігаў, а таксама нашы футбалісты, якія выступаюць за мяжой. Пасля гэтага мы падзялілі ўсіх на 7 каманд, сфармаваных выключна паводле геаграфічнага прынцыпу. Як звычайна і бывае пры складанні сімвалічных зборных, мы не вельмі дэталёва прывязваліся да пазіцый футбалістаў: так, гулец, які звычайна выступае на правым флангу, у нашым варыянце цалкам можа апынуцца цэнтральным абаронцам.

Зборная Берасцейскай вобласці

Трэнер: Аляксандр Ермаковіч

Адразу 5 футбалістаў гэтай зборнай так ці інакш звязаныя з барысаўскім БАТЭ. Таму лагічна, што і трэніраваць гэтую каманду павінен ураджэнец Лунінца Аляксандр Ермаковіч. Пад яго кіраўніцтвам апынуўся выдатны калектыў, моцнымі бакамі якога з'яўляюцца непраходная звязка апоры і магутная група атакі. Тон наперадзе задаюць не старэючы Васілюк, Сігневіч, які паступова выходзіць на топ-узровень і паспяховы гэтым летам Януш. Што тычыцца абароны і брамніка, то там усё не так прыгожа. Аднак, з іншага боку, навошта ўвогуле патрэбная абарона, калі наперадзе такія тытаны?!

Зборная Віцебскай вобласці

Трэнер: Георгій Кандрацьеў

Паўночная дружына ўяўляе сабой цікавы генетычны набор. З аднаго боку, тут у наяўнасці фантастычная крэатыўная група. З іншага, у абароне, за выключэннем Шытава, запар першая ліга. Або каля таго. Словам, ёсць адчуванне, што зборная Віцебскай вобласці спрабавала б гуляць паводле прынцыпу «вы заб'яце колькі зможаце, а мы колькі захочам». Ну а калі атрымлівалася б так, што апаненты ўсё роўна забівалі б больш, у настаўніка гэтай каманды заўсёды была б напагатове любімая адгаворка пра кадравы дэфіцыт.

Зборная Гомельскай вобласці

Трэнер: Віктар Ганчарэнка

Моцная, камлюкаватая каманда. Асаблівых вынаходстваў няма, але і адкрыта слабых месцаў таксама не назіраецца. Галоўная зорка тут не на полі, а каля броўкі. Віктар Ганчарэнка напэўна б пабудаваў нешта цікавае нават у такіх умовах. Тым больш, што многія яго падапечныя выдатна знаёмыя паміж сабой - узяць хоць бы некалі зорную пару форвардаў Блізнюк - Канцавы.

Зборная Гарадзенскай вобласці

Трэнер: Сяргей Саладоўнікаў

Адразу агаворым такі нюанс: мы ў курсе, што Сяргей Саладоўнікаў нарадзіўся ў Іркуцку. Аднак тут той самы выпадак, калі ад геаграфічнага прынцыпу можна і трэба адступіць. Усё ж такі цяжка ўявіць, што гарадзенскім футболам наогул можа кіраваць нехта іншы. Таму дазволім сабе невялікае патуранне і не будзем ладзіць конкурс «нагугліць іншага трэнера з Гарадзеншчыны». Лепшай кандыдатуры ўсе роўна ж не знайсці.

У распараджэнні Сяргея Вітальевіча апынуўся класны падбор гульцоў. У адрозненне ад многіх іншых каманд, тут не назіраецца перакосу ў бок атакі - абарона таксама як на падбор, некалькі гадоў таму такую канструкцыю цалкам можна было б уявіць нават каля брамы нацыянальнай зборнай. Радуе і група атакі, тон у якой задаюць лідары БАТЭ і «Нёмана» Крывец і Савіцкі. Магчыма, калі б Павел выступаў за такую каманду ў рэальнасці, ён бы ўжо дайшоў да той кандыцыі, за якой намячаецца доўгачаканы ад'езд за мяжу...

Зборная Менска

Трэнер: Леанід Кучук

Калі заплюшчыць вочы на не самую зорную пару форвардаў, тут усё ў поўным ажуры. Што, дарэчы, сур'ёзна адрознівае Беларусь практычна ад усіх еўрапейскіх дзяржаў. Сталіцы рэдка нараджаюць шмат футбольных талентаў - моладзі тут ёсць чым заняцца і акрамя футбола, таму галоўныя зоркі, як правіла, з'яўляюцца ў «глухіх правінцыях ля мора». У нас усё не так. Ледзь не пятая частка футбалістаў вышэйшай лігі з'явілася на свет менавіта ў Менску, што робіць выбар Леаніда Кучука практычна неабмежаваным.

Зборная Менскай вобласці

Трэнер: Алег Кубараў

А вось калі ад'ехаць ад кальцавой на лічаныя дзясяткі кіламетраў - і з футбалістамі адразу становіцца туга. Шчыра прызнацца, нам з вялікай працай атрымалася нарваць з ростэраў адзінаццаць ураджэнцаў Меншчыны. Само сабой, каманда з іх атрымалася не самая ўражлівая. Аднак і яна здольная пашумець. Асабліва, калі раптам згулялі лепшы футбаліст унутранага чэмпіянату Ігар Стасевіч і ўпаўнаважаныя дзеючага чэмпіёна Ілля Алексіевіч і Аляксандр Карніцкі.

Зборная Магілёўскай вобласці

Трэнер: Аляксандр Сяднёў

Тут недахопу ў кваліфікаваных кадрах не было ніколі. Зборная Магілёўшчыны выглядае рэальнай сілай, а паўабарона у гэтай каманды наогул здольная ўвагнаць у жах кожнага ўдзельніка нашага віртуальнага першынства. Тым больш крыўдна за мясцовых фанаў: пры такім россыпу класных гульцоў неяк балюча ўсведамляць, што «Днепр» і «Белшына» вымушаныя паныла пасвіцца ў глыбіні другой шасцёркі...