Беларускія барцы заваявалі дзве «бронзы» на ЧС ва Узбекістане

Уладзіслаў Андрэеў і Алі Шабанаў сталі ўладальнікамі бронзавых узнагарод на чэмпіянаце свету ў спартыўнай барацьбе, які стартаваў у Ташкенце.

На шляху да заваёвы ўзнагароды ў сваём вазе Уладзіслаў Андрэеў падолеў у першай сутычцы прадстаўніка Францыі Захэйра Элуарака (3:1). Далей беларус выйшаў пераможцам з лікам 2:0 і з другой сутычкі, якую праводзіў супраць румынскага спаборніка Андрэя Дукава. У 1/4 фіналу Андрэеву ў спаборнікі трапіўся сярэбраны прызёр Алімпійскіх гульняў і дзеючы чэмпіён Еўропы грузін Уладзімір Хінчэгашвілі. Апошні не даў шанцаў на поспех менш тытулаванаму атлету. Прайграўшы 0:4, беларускі спартовец атрымаў права выступіць у суцяшальных паядынках. Гэтую магчымасць заваяваць бронзавы медаль ён выкарыстаў спаўна. Першы паядынак суцяшальнага раўнда Уладзіслаў Андрэеў з вялікім лікам 6:0 выйграў у азербайджанца Ахмедмабі Гюзатылава. У другім упарты супраціў прадстаўніку Беларусі аказаў мангольскі атлет Бекбаяр Эрдэнебат. Судзейская брыгада аддала перамогу Андрэеву на апошнім дзеяння пры роўным ліку 1:1. Другім бронзавым медалём у вазе да 57 кг завалодаў іранец Хасан Рахімі. Чэмпіёнам свету стаў прадстаўнік КНДР Кьон Іл Янь, які ў фінале перамог Уладзіміра Хінчэгашвілі.

У вазе да 70 кг Алі Шабанаў дайшоў да паўфіналу. Спачатку ён апынуўся мацнейшым за ўкраінца Расціслава Первачука, у якога выйграў датэрмінова (11:1). Затым не менш пераканаўча ён падолеў змагара з Пуэрта-Рыка Пэдра Сота (11:0). У чвэрцьфінале Шабанаў з перавагай у тры балы (5:2) тактычна перамог Ніка Томаса Мейрабла з ЗША. Паўфінальная сустрэча з расейцам Хетагу Цабалавым у Шабанава не задалася з першых хвілін. Беларускі атлет пацярпеў адчувальнае паражэнне (0:11), аднак не паў духам і паядынак за 3-е месца ўпэўнена выйграў у канадскага спартоўца Клеопаса Нсубе (13:1). Другую бронзу ў гэтай вазе заслужыў узбек Бекзад Абдурахманаў. Золата здабыў Хетагу Цабалаў, серабро здабыў Якупаў Гару з Турцыі.