Мінабароны Украіны: Войска Расеі планавала за тры дні захапіць увесь Данбас

Найбольшая канцэнтрацыя войскаў акупантаў была ў Луганску.

Расейскія войскі планавалі за тры дні выцесніць сілы антытэрарыстычнай аперацыі з Данбаса. Пра гэта міністр абароны Украіны Валерый Гэлетей заявіў перад пасяджэннем урада, паведамляе інфармагенцтва РБК-Украіна.

«Калі казалі аб Ілавайску, на самай справе самая вялікая небяспека была ў Луганску. Вы чулі пра гэта? Вы ведаеце, што большая частка расейскіх Узброеных сіл менавіта пайшла на Луганск? Менавіта ў гэтым сцэнары за тры дні яны павінны былі практычна выцесніць украінскія Узброеныя сілы з тэрыторыі Данецкай і Луганскай абласцей», - заявіў Гэлетей.

Пры гэтым міністр паскардзіўся, што поспеху сіл антытэрарыстычнай аперацыі перашкодзіла тое, што ў шматлікіх сілавікоў ёсць мабільныя прылады і доступ да Інтэрнэту.

«Таму што шмат у нас ёсць прадстаўнікоў, якія прыязджаюць на вайну з планшэтамі, мабільнымі тэлефонамі... інфармацыя, якая негатыўна ўплывае на гэтыя працэсы... Мы і мелі некаторыя рэчы, якія адбыліся», - сказаў міністр.

Раней дарадца кіраўніка МУС Антон Герашчанка распавёў, калі менавіта пачалося ўварванне расейскіх войскаў у Данецкую і Луганскую вобласці. З ягоных слоў яно адбылося яшчэ 24 жніўня, у Дзень Незалежнасці Украіны.

Фота з архіву РІА «Новости»