Лукашэнка запрасіў прэзідэнта Нігерыі ў Беларусь
19- 10.09.2014, 14:01
- 8,293
8-9 верасня адбыўся афіцыйны візіт беларускай дэлегацыі ў Федэратыўную Рэспубліку Нігерыю.
Падчас візіту беларускай дэлегацыі ў Нігерыю міністр замежных спраў Беларусі Уладзімір Макей перадаў прэзідэнту афрыканскай краіны асабістае пасланне Лукашэнкі з запрашэннем наведаць Беларусь.
Пра гэта паведамілі charter97.org у прэс-службе МЗС Беларусі.
«Уладзімір Макей сустрэўся з прэзідэнтам рэспублікі Гудлакам Джанатанам і кіраўнікамі шэрагу міністэрстваў. Стораны абмеркавалі развіццё партнёрства ў палітычнай, гандлёва-эканамічнай, вайскова-тэхнічнай і іншых галінах.
Беларускі міністр распавёў нігерыйскаму калегу аб планах у стварэнні зборачных вытворчасцяў беларускай трактарнай, сельскагаспадарчай і аўтамабільнай тэхнікі ў Нігерыі.
Падпісана пагадненне аб супрацоўніцтве паміж Беларускай гандлёва-прамысловай палатай і нігерыйскай асацыяцыяй гандлёва-прамысловых, горназдабыўных і сельскагаспадарчых палат. Пагадненне прадугледжвае актывізацыю работы ў падрыхтоўцы і правядзенні ўзаемных візітаў дзелавых колаў, пошуку гандлёва-эканамічных партнёраў, абмену камерцыйнымі прапановамі», - адзначылі ў прэс-службе.
«Беларусь ганарыцца тым, што цесна супрацоўнічае з Расеяй, Кітаем і Індыяй, а таксама іншымі значнымі краінамі, такімі як Венесуэла, Егіпет, Паўднёвая Афрыка, а таксама Нігерыя. Цяпер Беларусь плануе ўмацоўваць і пашыраць межы замежнаэканамічнага супрацоўніцтва з саюзнікамі і партнёрамі ў Афрыцы. Нігерыя - адна з вядучых афрыканскіх эканомік, з'яўляецца для нас акном у рэгіён Заходняй Афрыкі», - заявіў падчас сустрэчы Уладзімір Макей.
Фота: прэс-служба МЗС Беларусі