Цела школьніка з Рэчыцы знайшлі ў будынку «Сведак Іеговы»

У рэчыцкай суполцы сведак Іеговы знайшлі цела падлетка.

Паводле папярэдняй інфармацыі, Саша скончыў жыццё самагубствам, пішуць «Моцныя навіны».

Пра гібель юнага сябра рэлігійнай арганізацыі лаканічна праінфармавалі ва ўпраўленні Следчага камітэта Гомельскай вобласці. Яго афіцыйная прадстаўніца Марыя Крываногава паведаміла, што бачных прыкмет гвалтоўнай смерці не выяўлена. Назвала асноўную версію - самагубства. На гэта паказвае і перадсмяротная запіска, змест якой у інтарэсах даследчай праверкі пакуль не раскрываецца.

У Рэчыцы адразу пасля трагічнага выпадку пабывалі прадстаўнікі абласных структур, якія курыруюць працу з дзецьмі. Дзіця не знаходзілася ні на якіх прафілактычных уліках, адзначыў намеснік старшыні камісіі ў справах непаўналетніх аблвыканкама Яўген Міткевіч.

Як распавяла старэйшая памочніца пракурора вобласці Вольга Шаўчэнка, хлапчуку падабалася дапамагаць айчыму-прадпрымальніку, а яшчэ гуляць у онлайн-гульні. Ён праходзіў медкамісію, каб служыць у войску, як яго старэйшы брат. Праўда, той яшчэ падлеткам з'ехаў з Рэчыцы да роднага бацькі ў Калінкавічы.

Падобных сумных выпадкаў з дзецьмі ў зарэгістраваных рэлігійных арганізацыях Гомельшчыны не змагла ўзгадаць памочніца пракурора вобласці Вера Замойская.

Фота: gp.by