Віталь Бубновіч здабыў «бронзу» на ЧС у стральбе
1- 13.09.2014, 21:27
- 2,986
Яшчэ адзін беларус стаў уладальнікам «бронзы» і алімпійскай ліцэнзіі ў стральбе з малакалібернай вінтоўкі на 50 м у трох паставах.
Віталь Бубновіч паказаў у гішпанскай Гранадзе вынік у 410,0 балы. Чэмпіёнам планеты ў гэтым тыпе праграмы быў кітайскі стралок Чжу Цынан (457,2 балы), а срэбра ў расейца Сяргея Каменскага (456,0), піша БелТА.
Да гэтага ў скарбонцы ў Віталя Бубновіча была яшчэ асабістая бронза ў стральбе з пнеўматычнай вінтоўкі на 10 м, а таксама дзве камандныя ўзнагароды: «срэбра» (разам з Сяргеем Мартынавым і Юрыем Шчарбацэвічам) і «бронза» (з Іллёй Чаргейкам і Юрыем Шчарбацэвічам).
У стральбе з малакалібернай вінтоўкі на дыстанцыі 50 м лежачы беларус Юрый Шчарбацэвіч таксама здабыў алімпійскі пропуск, стаўшы уладальнікам «бронзы» сусветнага першынства.
За ўзнагароды сусветнага першынства і алімпійскія ліцэнзіі змагаюцца больш за 2 тысячы спартоўцаў з 93 краін. Планетарны стралковы форум, які праводзіцца раз у чатыры гады, будзе доўжыцца да 20 верасня.