Дзень выбараў у Расеі

У Расеі праходзіць адзіны дзень галасавання - самы маштабны за апошні час.

Жыхары 84 з 85 рэгіёнаў (акрамя Інгушэціі) вызначаюць лёс звыш 43 тысяч мандатаў. Падчас прамых выбараў будуць абраныя 14 рэгіянальных парламентаў. У 21 адміністрацыйным цэнтры жыхары галасуюць за дэпутатаў парламентаў, піша ІТАР-ТАСС.

Будуць абраныя кіраўнікі выканаўчай улады ў рэгіёнах. 30 губернатараў насельніцтва абярэ шляхам прамога галасавання, а ў Крыме, Севастопалі і Кабардзіна-Балкарыі ў кастрычніку кіраўнікоў абяруць дэпутаты парламентаў. Таксама 14 верасня будуць абраныя тры мэры сталіц суб'ектаў РФ: Благавешчанска, Паўднёва-Сахалінска і Анадыра.

Першымі а 00:00 паводле маскоўскага часу адкрыліся выбарчыя ўчасткі на Камчатцы, дзе пройдуць мясцовыя выбары. Упершыню на выбарчых участках з’явяцца жыхары новых суб'ектаў РФ: акупаваных у сакавіку Крыма і Севастопаля.

Паводле звестак ЦВК РФ, выбары ахопліваюць 75 мільёнаў выбаршчыкаў. Ва ўсёй Расеі 14 верасня будуць працаваць 64 тысячы выбарчых участкаў.

З 69 партый, якія маюць права браць удзел у выбарах, у гонку ўключыліся 63. На фінішнай прамой, паводле звестак Цэнтрвыбаркама, знаходзяцца 56 партый. Агульная колькасць кандыдатаў на выбарах рознага ўзроўню - больш за 100,2 тысячы. У сярэднім па краіне на адзін мандат прэтэндуюць шэсць-сем кандыдатаў.

Парламенцкія выбары пройдуць і ў сталіцы Расеі, дзе ўпершыню за апошнія 11 гадоў дэпутаты будуць абірацца выключна ў аднамандатных акругах. Новая Масгардума павялічыць свой колькасны склад - з 35 да 45. Выбарчыя ўчасткі ў Маскве адкрыліся а 08:00 паводле маскоўскага часу.

У Маскве ў датэрміновых выбарах, паводле звестак Масгарвыбаркама, узялі ўдзел 27 тысяч 841 выбаршчыкаў. Сярод тых, хто прагаласаваў датэрмінова, быў і прэзідэнт Расеі Уладзімір Пуцін, які зрабіў свой выбар у сераду, 10 верасня.

У сваіх выбарчых фондах палітычныя партыі акумулявалі ў агульнай складанасці амаль два мільярды рублёў. Самай багатай апынулася ЛДПР - 215 мільёнаў рублёў. У «Адзінай Расеі» - 196 мільёнаў рублёў, у «Справядлівай Расеі» - 51 мільён рублёў, у «Яблыка» - 47 мільёнаў рублёў, у КПРФ - 28 мільёнаў рублёў, у «Патрыётаў Расеі» - 9,9 мільёна рублёў.