Развітанне з Пятром Марцавым пройдзе 15 верасня

Цырымонія развітання адбудзецца ў Менску.

Пра гэта паведаміла ў сваім акаўнце ў сацыяльнай сетцы "Фэйсбук" журналістка Святлана Калінкіна.

"Развітанне з Пятром Марцавым адбудзецца заўтра ў рытуальнай зале на Альшэўскага з 12.00 да 15.00", - напісала яна.

Вядомы выдавец і журналіст памёр вечарам 13 верасня.

***

Марцаў Пётр Паўлавіч нарадзіўся 14 красавіка 1962 года ў горадзе Менску.

Вучыўся ў СШ №4 Менска.

Выпускнік філалагічнага факультэта Беларускага дзяржаўнага ўніверсітэта (1984).

У 1984 - 1986 гг. працаваў настаўнікам рускай мовы і літаратуры ў школе рабочай моладзі №19 Менска. У 1986 - 1988 гг. працаваў карэспандэнтам, старэйшым рэдактарам у Беларускім тэлеграфным агенцтве (БелТА). Вымушаны быў звольніцца пасля свайго ўдзелу ў мітынгах ля Усходніх (Маскоўскіх) могілак і ў Курапатах. Быў загадчыкам аддзела часопіса "Ветразь" (1989 - 1990), уласным карэспандэнтам штотыднёвіка "Коммерсант" у Беларусі, дырэктарам карпункта "Коммерсант" і агенцтва "Пастфактум" (1991 - 1993).

У 1992 пачаў займацца прадпрымальніцкай дзейнасцю: выдаваць газету "Биржи і банки: Белорусская деловая газета" (з 1999 - "Белорусская деловая газета"), штотыднёвік "Імя» (1995 - 1999).

З 1997 года - прэзідэнт ЗАТ "Белорусская деловая газета", галоўны рэдактар "Белорусской деловой газеты"),

У 1997 годзе стаў адным з заснавальнікаў грамадзянскай ініцыятывы "Хартыя'97".

З 2002 года - генеральны дырэктар УП "Марат", выдавец "Белорусской деловой газеты"), і "БДГ. Для службовага карыстання".

У сакавіку 2006 года выхад "Белорусской деловой газеты" прыпынены ў сувязі з забаронай на яе друк у беларускіх друкарнях і распаўсюджванне праз РУП "Белпошта" і "Белсаюздрук".

Прадзюсер і адзін з аўтараў сцэнарыя дакументальнага фільма "Звычайны прэзідэнт" (1996 г). (Прэмія Міру Берлінскага кінафестывалю, 1997г)

Уваходзіў у дваццатку самых уплывовых прадстаўнікоў мас-медыя краін СНД (2001).

Узнагароды: Ганаровы дыплом Беларускай асацыяцыі журналістаў "За зацвярджэнне свабоды слова ў Беларусі".