Віталь Клічко ўзначаліў спіс «Блока Парашэнкі»

Спіс кандыдатаў на парламенцкія выбары ад «Блока Пятра Парашэнкі» ўзначаліў мэр Кіева, лідэр партыі УДАР Віталій Клічко.

Пра гэта ён заявіў, выступаючы на з'ездзе Блока 14 верасня ў Кіеве, паведамляе «Украінская праўда».

«Украіна сёння, як ніколі, мае патрэбу нацыянальнага адзінства і кансалідацыі. Таму я пагадзіўся ўзначаліць аб'яднаны спіс Блока Парашэнкі», - адзначыў ён. Са слоў Клічко, сёння «вельмі важнае яднанне дэмакратычных сіл», і ў новым парламенце «мы павінны ўзяць як мага больш месцаў, каб там было менш сіл, якія спрабуюць раскідаць Украіну».

Паводле звестак Hromadske TV, у першую дзесятку ўвойдуць Юрый Луцэнка, Вольга Багамолец, Уладзімір Гройсман і Мустафа Джамілеў. Акрамя таго ў спіс папярэдне ўвайшлі легендарны маёр Юлій Мамчур, Марыя Маціёс, Мікалай Таменка і Ірына Герашчанка, а таксама Віталь Кавальчук. Лідэр фракцыі УДАР Віталь Кавальчук заявіў, што УДАР ідзе на выбары ў складзе «Блока Парашэнкі», на з'езд запрошаныя цяперашнія дэпутаты фракцыі УДАР і кіраўнікі абласных партыйных арганізацый.

У спіс Блока ўвойдуць прадстаўнікі крымска-татарскага народа Мустафа Джамілеў і Рафат Чубараў, журналісты Мустафа Наем, Сяргей Лешчанка і актывістка Святлана Залішчук. Аднак, якія месцы ў спісе яны зоймуць, невядома. Падчас з'езда лідэр палітсілы Юрый Луцэнка заявіў, што «Блок Пятра Парашэнкі» гатовы ўзгадняць кандыдатаў у мажарытарных акругах з іншымі дэмакратычнымі сіламі і заклікаў палітычныя сілы да супрацоўніцтва.