Рада БНР патрабуе ад Лукашэнкі не ўцягваць беларусаў у вайну

Ад таго, як будуць развівацца падзеі ва Украіне, залежыць лёс Беларусі і ўсяго рэгіёну.

У рэдакцыю сайта charter97.org прыйшла заява Рады БНР, у якой гаворыцца аб неабходнасці падтрымкі і абароны Украіны.

«Рада БНР занепакоеная фактам узброенай агрэсіі Расейскай Федэрацыі супраць Украіны і наступствамі для лёсу Беларусі і рэгіёну, канстатуе, што цяперашнія дзеянні Расейскай Федэрацыі, як і папярэдняя анэксія Крыма, носяць незаконны характар і супярэчаць базавым прынцыпам міжнароднага права і прынцыпам міжнароднай бяспекі, распрацаваным пасля Другой сусветнай вайны, а таксама ўласным міжнародным абавязацельствам Расейскай Федэрацыі згодна са Статутам ААН і іншым двухбаковым і шматбаковым міжнародным актам. Рада БНР заклікае міжнародную супольнасць аказаць усю магчымую падтрымку абароне Украіны ад замежнай агрэсіі, разглядаючы сапраўдную сітуацыю як найбольш сур'ёзнае выпрабаванне для механізмаў бяспекі на еўрапейскім кантыненце, для ўсёй сучаснай сістэмы бяспекі ў міжнародных стасунках, а таксама для механізмаў забеспячэння жыцця народаў Еўропы ў міры і згодзе з часоў Другой Сусветнай вайны», - адзначаецца ў заяве.

Рада БНР таксама заклікае стораны канфлікту ва Усходняй Украіне да канчатковага пераводу супрацьстаяння з ваеннага рэчышча ў палітычнае, а міжнародная супольнасць - да садзейнічання такому пераводу, перш за ўсё праз уплыў на кіраўніцтва Расейскай Федэрацыі.

«Рада БНР папярэджвае афіцыйных асоб Рэспублікі Беларусь аб адказнасці за магчымае ўцягванне Беларусі ў вайну і падтрымку ўзброенай агрэсіі. Удзел Беларусі ў агрэсіўных замежных авантурах кіраўніцтва Расеі, або прамое ці ўскоснае садзейнічанне ім, з'яўляюцца цалкам недапушчальнымі, улічваючы асабліва цяжкія страты, якія Беларусь панесла ў выніку войнаў на працягу апошніх стагоддзяў. У прыватнасці, недапушчальным з'яўляецца выкарыстанне для любых формаў уключэння Беларусі ў вайну абавязкаў, прынятых ад імя Беларусі дзяржаўным кіраўніцтвам Лукашэнкі ў рамках Арганізацыі Дамовы калектыўнай бяспекі, а таксама любых іншых угод, укладзеныя названым дзяржаўным кіраўніцтвам ад імя Беларусі з Расейскай Федэрацыяй. Рада заклікае міжнародную супольнасць, нягледзячы на спробы рэжыму Лукашэнкі атрымаць з цяперашняй міжнароднай сітуацыі выгаду на карысць палітычнага і эканамічнага становішча сваёй улады над Беларуссю, прытрымлівацца паслядоўнай і цвёрдай пазіцыі што да гэтага недэмакратычнага і рэпрэсіўнага рэжыму. Рада БНР падкрэслівае, што комплексная нармалізацыя стасункаў паміж сучаснымі ўладамі Рэспублікі Беларусь і міжнароднай супольнасцю дапушчальная толькі пасля вызвалення і рэабілітацыі», - гаворыцца ў заяве.

Рада падкрэслівае, што комплексная нармалізацыя стасункаў паміж сучаснымі ўладамі Рэспублікі Беларусь і міжнароднай супольнасцю дапушчальная толькі пасля вызвалення і рэабілітацыі беларускіх палітычных зняволеных, правядзення дэмакратычных выбараў у Беларусі і пры ўмове забеспячэння грамадзянам Рэспублікі Беларусь базавых дэмакратычных свабодаў.

«Рада БНР таксама выказвае сваю салідарнасць і падтрымку народу, дзяржаўнаму і вайсковаму кіраўніцтву Украіны, які перажывае адзін з найбольш драматычных і адказных момантаў у сваёй найноўшай гісторыі. Ад таго, ці вытрымае Украіна цяперашнія выпрабаванні, будзе залежаць і будучыня Беларусі і рэгіёну. Рада вітае і разглядае ўсякую падтрымку, якую беларусы ў Беларусі і ва ўсім свеце будуць аказваць украінскаму народу і дзяржаве ў справе абароны суверэнітэту Украіны ад замежнай агрэсіі, а таксама такую падтрымку трэцім старанам, якія б дзейнічалі ў названых мэтах, як адпаведным доўгатэрміновым інтарэсам нацыянальнай бяспекі Беларусі», - падкрэсліваецца ў заяве.