Жыхар Віцебска вёз марыхуану праз мяжу ў мяшку з ежай
1- 15.09.2014, 20:06
- 9,017
У пункце мытнага афармлення «Варшаўскі мост» з дапамогай службовага сабакі выяўленыя наркотыкі.
Падчас надгляду рэйсавага аўтобуса Варшава-Санкт-Пецярбург службовы сабака зрэагаваў на мяшок, які ляжаў на пасажырскім сядзенні. Унутры мяшка сярод прадуктаў харчавання быў знойдзены скрутак з фольгі з рэчывам расліннага паходжання зялёнага колеру. Было ўстаноўлена, што на гэтым месцы з Чэхіі ў Віцебск ехаў грамадзянін Беларусі, які разам з пасажырамі аўтобуса праходзіў працэдуру мытнага афармлення. Пасля перасячэння лініі зялёнага калідора гаспадар мяшка быў спынены супрацоўнікамі аддзела кіналагічнай службы мытні, піша БелТА.
Падчас апытання 28-гадовы жыхар Віцебска пацвердзіў, што ў скрутку з фальгі знаходзіцца марыхуана. Акрамя таго, ён добраахвотна выдаў аналагічнае рэчыва, якое знаходзілася ў ягонай кішэні. Паводле высновы экспэрта-крыміналіста, грамадзянін сапраўды перавозіў праз мяжу марыхуану агульнай вагой звыш 5 г.
У дачыненні да гаспадара наркатычнага рэчыва Берасцейская мытня распачала крымінальную справу паводле ч.2 арт.228 КК (кантрабанда).