Барозу абяцае Украіне сяброўства ў ЕЗ

Украіна мае такія ж правы, як і ўсе астатнія еўрапейскія краіны.

У аўторак украінскі парламент плануе ратыфікаваць пагадненне аб асацыяцыі з ЕЗ. Старшыня Еўрапейскай камісіі Жазэ Мануэл Барозу (Jose Manuel Barroso), чые паўнамоцтвы неўзабаве мінаюць, зрабіў ужо наступны крок, сказаўшы, што цалкам можа сабе ўявіць, што Украіна стане сябрам ЕЗ, піша Der Spiegel (пераклад - Inosmi.ru).

Барозу зрабіў важны крок насустрач загразлай у канфлікце з Расеяй Украіне - прынамсі, на словах. Як ён сказаў на Ялцінскай еўрапейскай стратэгіі (YES) у Кіеве, Украіна належыць да «сям'і еўрапейскіх нацый». Са слоў Барозу, калі ён заняў гэтую пасаду, ЕЗ складаўся ўсяго толькі з 15 краін, а за мінулыя дзесяць гадоў, цягам якіх ён кіраваў Еўракамісіяй, іх колькасць амаль падвоілася і дасягнула 28.

Барозу параўнаў Украіну з Польшчай і падкрэсліў, што на момант падзення Бэрлінскай сцяны (восенню 1989 - заўв. пер.) Прадукцыйнасць эканомікі абедзвюх краін у пераліку на душу насельніцтва была прыкладна аднолькавай. Аднак сёння ВУП Польшчы ўтрая перасягае ўкраінскі. «Няўжо такое развіццё немагчымае на Украіне?» - спытаў старшыня Еўракамісіі. «Вы яшчэ не дасягнулі сваёй мэты», - сказаў ён гаспадарам форуму, але дадаў: «Украіна мае такія ж правы, як і ўсе астатнія еўрапейскія краіны».

Шпілька на адрас Юнкера

За першы крок да патэнцыйнага ўступлення ў ЕЗ уважаюць пагадненне аб асацыяцыі паміж ЕЗ і Украінай. Пасля таго, як папярэдні прэзідэнт Віктар Януковіч у канцы мінулага года адмовіўся падпісаць яго, сітуацыя ў краіне абвастрылася і вылілася ў масавыя пратэсты на плошчы Незалежнасці ў Кіеве ў лютым гэтага года. Януковічу ў выніку давялося бегчы з краіны, а новы прэзідэнт Пётр Парашэнка ўсё ж падпісаў пагадненне аб асацыяцыі. І цяпер у аўторак плануецца адначасовая ратыфікацыя гэтага дакумента парламентамі ў Страсбургу і Кіеве.

У той жа час рэалізацыю пагаднення давялося адкласці на адзін год. Тым самым ЕЗ пайшоў на значныя саступкі Расеі, улады якой запатрабавалі ўнесці ў пагадненне аб зоне свабоднага гандлю больш за дзве тысячы паправак. Камісар ЕЗ у пытаннях пашырэння Штэфан Фюле (Stefan Füle) у размове з прэсай у Кіеве выступіў у абарону гэтых саступак у дачыненні да Масквы.

Пуцін зноў прыстрашыў Украіне эканамічнай вайной у выпадку ратыфікацыі пагаднення, растлумачыў Фюле. У сувязі з гэтым ЕЗ выступіў з прапановай адкласці ўваходжанне дакумента ў дзеянне. Тым самым Брусэль хоча здабыць час, каб пераканаць расейцаў у тым, што гэтая дамова ні ў якім разе не небяспечная для расейскай эканомікі.

«Нічога не змянілі, ніводную коску»

Адзінай умовай, аднак, з'яўляецца тое, што замірэнне на ўсходзе Украіны павінна выліцца ў паўнавартасны мірны працэс. «Гэтую ўмову расейцы прынялі», сказаў чэх. У той жа час, паводле ягоных слоў, для Украіны перанос уступлення пагаднення аб асацыяцыі з ЕЗ у дзеянне не выкліча ніякіх нязручнасцяў. Так, украінская прадукцыя, экспартуемая ў краіны ЕЗ, не будзе абкладацца мытамі да таго часу, пакуль пагадненне не ўвойдзе ў дзеянне. Сам жа дакумент застаўся без зменаў «аж да апошняй коскі», - запэўніў Фюле.

Як і Барозу, Фюле не выключыў уступлення Украіны ў Еўразвяз. Гэтую пастанову, паводле ягоных слоў, будуць прымаць самі краіны-чальцы ЕЗ.

Той факт, што старшыня Еўракамісіі і адзін з камісараў за лічаныя тыдні да заканчэння сваіх паўнамоцтваў разважаюць аб уступленні Украіны ў ЕЗ, можна разглядаць як невялікую «шпільку» на адрас новага старшыні камісіі Жана-Клода Юнкера (Jean-Claude Juncker). Апошні падчас перадвыбарчай кампаніі паабяцаў, што ЕЗ цягам наступных пяці гадоў не будзе нікога прымаць у свае шэрагі. Дэпартамент, якім кіруе Фюле, і які дагэтуль называўся Дэпартаментам у пытаннях пашырэння і палітыкі добрасуседства, Юнкер пераназваў у Дэпартамент у пытаннях палітыкі добрасуседства і перамоваў аб пашырэнні. Яго неўзабаве ўзначаліць аўстрыец Ёханэс Хан (Johannes Hahn).

Чыноўнікі ў Брусэлі гавораць аб новым «папулісцкім» кроку. Пашырэнне ЕЗ з'яўляецца адным з найважнейшых паказнікаў яго паспяховасці. Юнкер, аднак, мяркуе, што Еўразвязу патрабуюцца ўнутраныя рэформы, перш чым прымаць у свае шэрагі новых чальцоў.

Гэта не адзінае перайменаванне еўрапейскіх структур. Пачынаючы з наступнага тыдня, новым еўракамісарам трэба будзе даваць справаздачу перад Еўрапейскім парламентам, без згоды якога Еўракамісія не зможа пачаць сваю працу.