Літоўскі дыпламат не раіць інвеставаць у Беларусь
1- 18.09.2014, 14:22
- 5,203
Санкцыі Расеі не будуць доўжыцца вечна, таму яны не могуць быць асноўным матывам інвестыцый у Беларусі
Наша краіна можа дапамагчы некаторым літоўскім вытворцам і пастаўшчыкам сыравіны, якія пацярпелі ад расейскага эмбарга, аднак банальнае пераклейванне этыкетак і фальсіфікацыя паходжання прадукту пагражаюць стратай грузу. Беларускія ўлады не церпяць кантрабанды забароненых у Расеі прадуктаў праз свае межы, але ёсць і легальныя спосабы скарыстацца беларускім рынкам для змякчэння наступстваў эмбарга, адзначае ў сваёй публікацыі ў чацвер літоўская дзелавая газета Verslo Zinios, піша ru.DELFI.lt.
Камерцыйны аташэ Літвы ў Рэспубліцы Беларусь Відмантас Вербіцкас сцвярджае, што ёсць тры спосабы, якімі можа скарыстацца літоўскі бізнэс: продаж сыравіны і паўфабрыкатаў беларускім перапрацоўшчыкам. Вытворчасць прадукцыі паводле заказаў беларускіх кампаній і пад іх гандлёвымі знакамі і спосаб, які найбольш цікавіць Беларусь - стварэнне сумеснага бізнэсу з беларусамі.
«Аднак варта мець на ўвазе, што беларуская сельская гаспадарка яшчэ ў большай ступені, чым уся астатняя эканоміка, належыць дзяржаве. Закупачны кошт на сыравіну і іншыя рэчы трапляюць у сферу дзяржрэгулявання, таму перанос вытворчасці не забяспечыць атрымання або паставак сыравіны», - сказаў Вербіцкас .
З ягоных слоў, санкцыі Расеі не будуць доўжыцца вечна, таму яны не могуць быць асноўным матывам інвестыцый у Беларусі.