Першая ракетка Вялікай Брытаніі - за незалежную Шатландыю

Эндзі Марэй у дзень гістарычнага рэферэндуму заявіў пра сваю падтрымку незалежнасці Шатландыі.

За гэта тэнісіст, які з'яўляецца першай ракеткай Вялікай Брытаніі, спазнаў «тролінг» з боку карыстальнікаў Twitter, якія не падзяляюць яго пазіцыю, піша РІА «Новости».

«Важнейшы дзень для Шатландыі сёння. Негатыў з боку кампаніі супраць незалежнасці апошніх дзён цалкам перавярнуў мае погляды. З нецярпеннем чакаю вынікаў. Давайце зробім гэта», - напісаў тэнісіст у сваім мікраблогу.

У адказ на гэтую заяву карыстальнікі сталі выказваць сваё расчараванне нацыяналістычнай пазіцыяй тэніснай зоркі.

Сёння ў Шатландыі стартаваў гістарычны рэферэндум у пытанні незалежнасці.

Калі большасць жыхароў Шатландыі адкажуць «так» на пытанне рэферэндуму і тым самым прагаласуюць за незалежнасць, 24 сакавіка 2016 г рэгіён выйдзе са складу Злучанага Каралеўства. Апытанні грамадскай думкі не даюць дакладнага ўяўлення аб зыходзе галасавання, паказваючы кожны раз рознае размеркаванне галасоў. Зыход галасавання, відавочна, будзе залежаць ад тых, хто пакуль не вызначыўся з пазіцыяй.