Беларуса Кучука звольнілі з пасады трэнера маскоўскага «Лакаматыва»

На яго ўсклалі адказнасць за няўдалыя вынікі клуба.

Маскоўскі «Лакаматыў» апублікаваў заяву савета дырэктараў клуба што да сітуацыі са зняццем з пасады галоўнага трэнера Леаніда Кучука. У ім асабліва падкрэсліваецца: для падрыхтоўкі каманды былі створаныя ўсе ўмовы, а адказнасць за няўдалыя вынікі ўскладзеная на настаўніка. Таксама адзначаецца, што функцыі выконваючага абавязкі галоўнага трэнера ўскладзеныя на старэйшага трэнера каманды - Ігара Чэраўчэнку, піша «Прессбол».

Цалкам тэкст заявы выглядае наступным чынам:

«17 верасня 2014 г. адбылося пасяджэнне савета дырэктараў ФК «Лакаматыў», на якім быў заслуханы даклад прэзідэнта клуба аб бягучым стане спраў. Чальцы савета дырэктараў адзначылі, што для каманды былі створаныя ўсе ўмовы, неабходныя для якаснай падрыхтоўкі да сезона. Каманда ўкамплектаваная высокакваліфікаванымі футбалістамі.

У такой сітуацыі адказнасць за нездавальняючы вынік выступлення каманды павінна быць ускладзеная на галоўнага трэнера. Галоўны трэнер заўсёды з'яўляецца адказным за вынік выступлення каманды.

У сувязі з гэтым савет дырэктараў прыняў пастанову пагадзіцца з прапановай прэзідэнта Клуба Смародскай Вольгі Юр'еўны аб мэтазгоднасці скасавання працоўнай дамовы з галоўным трэнерам Кучуком Л.С. Функцыі выконваючага абавязкі галоўнага трэнера ўскладзеныя на старэйшага трэнера каманды - Ігара Чэраўчэнку».