У аквапарку «Лебядзіны» запрацуюць трэнажоры для сёрфінгу

У сталічным аквапарку «Лебядзіны» 21 верасня пачнуць працаваць сёрфінг-трэнажоры Flowrider.

Пра гэта паведамляе «Менск-Навіны».

Як распавяла крэатыўны дырэктар РК «Лебядзіны» Аліна Змачынская, трэнажоры прызначаныя для адзіночнага катання на сёрфбордзе па паверхні штучнай хвалі з нізкім грэбнем. Цяпер у аквапарку ўсталяваныя два адзіночныя сёрфінг-трэнажоры для адначасовага катання.

У першыя месяцы трэнажоры будуць працаваць з пятніцы да нядзелі з 10.00 да 22.00. Скарыстацца паслугай можна будзе як у комплексе з наведваннем аквапарку, так і асобна. Кошт заняткаў: 15 хвілін - 130 тыс. рублёў, арэнда трэнажора на 1 гадзіну - 600 тысяч рублёў.

Паспрабаваць свае сілы на сёрфінг-трэнажоры і павучыцца ў дасведчаных трэнераў змогуць нават дзеці. Узроставая група ад 6 да 14 гадоў - у прысутнасці бацькоў, з 14 гадоў - без суправаджэння. Кансультаваць жадаючых будуць прафесійныя інструктары - былы галоўны трэнер зборнай Беларусі ў сноўбордзе Дзяніс Ганакаў, сноўбардыст Артур Качура і іншыя.