Навукоўцы з чатырох краін атрымалі «Шнобеля» за даследаванне сувязі катоў і псіхікі

У Гарвардскім універсітэце адбылася цырымонія ўручэння Шнобелеўскай прэміі за самыя кур'ёзныя дасягненні ў навуцы за 2014.

Аб гэтым паведамляецца на сайце часопіса "Аналы неверагодных даследаванняў" (The Improbable Research), піша NEWSru.com.

У гэтым годзе прэмію ў галіне аховы здароўя атрымалі групы навукоўцаў з Чэхіі, Японіі, ЗША і Індыі, якія вывучалі, як утрыманне хатніх коцікаў адбіваецца на разумовым і псіхічным здароўе уладальнікаў. Яны даследавалі змены асобы ў маладых жанчын з таксаплазмозам (інфекцыяй, якая перадаецца ад котак), уплыў гэтага паразітарнага захворвання на інтэлект і сувязь паміж укусамі кошкі і дэпрэсіяй. Трое навукоўцаў з'явіліся на цырымонію ўручэння прызоў.

У біялогіі зноў вызначыліся чэхі, а таксама вучоныя з Нямеччыны і Замбіі. Гэтая група даследчыкаў старанна задакументавала той факт, што сабакі, выбіраючы месца, дзе памачыцца і аправіцца, аддаюць перавагу размяшчэнню ў прасторы ўздоўж магнітных мерыдыянаў зямлі.

Японцы святкавалі перамогу ў фізіцы: яны вывучылі ступень трэння паміж падэшвай абутку і бананавай лупінай, а таксама паміж лупінай і паверхняй падлогі ў сітуацыі, калі на яе наступае чалавек.

У галіне нейранавук вызначыліся кітайцы і канадцы, якія спрабавалі зразумець, што адбываецца ў мозгу чалавека, здольнага ўбачыць аблічча Хрыста ў кавалачку тоста.

Шнобеля ў медыцыне ўганараваныя навукоўцы з Індыі і ЗША, якія лячылі насавыя крывацёкі пры дапамозе тампонаў з вэнджанай свініны, а ў галіне палярных даследаванняў вызначыліся немцы і нарвэжцы: іх цікавіла рэакцыя паўночных аленяў на людзей, перапранутых белымі мядзведзямі.

Псіхолагі з Аўстраліі, Вялікабрытаніі і ЗША былі адзначаныя за фактычнае абгрунтаванне таго, што многія даўно падазравалі: людзі-"совы", якія позна кладуцца спаць, у сярэднім больш самаўлюбёныя, чым "жаўрукі". Акрамя таго, яны часцей маніпулююць людзьмі і праяўляюць больш псіхапатычныя рысы, чым аматары ускочыць раным-рана.

Прэмія ў галіне мастацтва дасталася італійцам. Яны вывучылі, як мастацкія вартасці сузіраць карціны ўплываюць на ўспрыманне болю. Падчас экспэрыменту яны параўналі болевыя адчуванні людзей ад уколу лазерам, пры гэтым адны ў гэты час глядзелі на прыемную, а іншыя - на выродлівую карціну.

Праца гішпанскіх дыетолагаў і нутрыцыяністаў таксама была адзначаная Шнобелем. Яны даследавалі патэнцыял лактабацілы, вылучаных з фекаліяў нованароджаных, у стварэнні прабіятычнай культуры для ферментаваных каўбас.

Нарэшце, прэмію ў галіне эканомікі атрымаў італійскі дзяржаўны Нацыянальны інстытут статыстыкі, які заклікаў еўрапейскія краіны пры афіцыйнай ацэнцы памераў эканомікі ўлічваць даходы ад прастытуцыі, незаконнага абароту наркотыкаў, кантрабанды і іншых незаконных добраахвотных угод.

Нягледзячы на парадыйны характар прэміі, варта адзначыць, што яна прысуджаецца "за дасягненні, якія спачатку прымушаюць смяяцца, а потым - задумацца". У рэчаіснасці, нягледзячы на кур'ёзныя прадметы даследавання, за імі часцей за ўсё стаіць сур'ёзная і важная праблема.

Прэмія ўручаецца з 1991 года і традыцыйна папярэднічае апавяшчэнню спісу лаўрэатаў Нобелеўскай прэміі. У мінулым годзе Шнобелеўскай прэміяй міру ўганараваўся беларускі дыктатар Лукашэнка за "забарону публічных воплескаў, а таксама за тое, што беларуская міліцыя арыштавала за воплескі аднарукага чалавека".