Польшча ў 26 разоў павялічыла экспарт вяршкоў у Беларусь

Асноўным пакупніком малочнай прадукцыі з Польшчы ў верасні быў «Савушкін прадукт».

Рассельгаснагляд можа абмежаваць імпарт прадукцыі шэрагу рыбных і малочных прадпрыемстваў Беларусі. Гэта можа адбыцца «праз прапарцыянальны рост рызык на фоне рэзкага павелічэння паставак рыбы з Нарвегіі і малочнай прадукцыі з Літвы і Польшчы ў Беларусь». Кіраўнік Рассельгаснагляду Сяргей Данкверт заявіў ІТАР-ТАСС, што служба мае намер узмацніць маніторынг беларускай прадукцыі праз незвычайны рост імпарту малочнай прадукцыі з Літвы і Польшчы і рыбы з Нарвегіі ў рэспубліку ў верасні 2014 супраць ліпеня і жніўня 2014 года.

«Мы паставілі на маніторынг прадукцыю шэрагу беларускіх прадпрыемстваў. Калі ў нас будуць падставы сумнявацца ў яе бяспецы, вядома ж, мы прымем свае меры», - сказаў памочнік кіраўніка Рассельгаснагляду Аляксей Аляксеенка.

Ён растлумачыў, што ведамства неаднаразова фіксавала мікрабіялагічнае забруджванне ў малочнай прадукцыі і прадукцыі рыбагаспадарчага комплексу, якая пастаўлялася з Беларусі. Так як колькасць гэтай прадукцыі на расейскім рынку павялічылася ў жніўні-верасні 2014 года, прапарцыйна выраслі рызыкі распаўсюджвання недабраякаснай прадукцыі.

Аляксеенка дадаў, што расейскае ведамства мае магчымасць уводзіць абмежаванні на пастаўкі ў Расею прадукцыі прадпрыемстваў Мытнага саюза. «Мы павінны забяспечваць бяспеку прадукцыі, адкуль бы яна ні паступала», - сказаў на заканчэнне ён.

Паводле звестак ведамства, за ўвесь ліпень 2014 года Беларусь імпартавала з Нарвегіі 1,1 тысяч тон астуджанай і замарожанай рыбы, а за 15 дзён верасня - 2,5 тысяч тон. Польшча ў ліпені 2014 паставіла ў рэспубліку 260 тон пастэрызаваных вяршкоў, а з 1 да 15 верасня 3,5 тысяч тон. Літва пачала імпартаваць у Беларусь пастэрызаваныя вяршкі ў жніўні 2014 года, а з 1 да 15 верасня аб'ём паставак склаў 264 тоны.

- Наша задача, калі калегі так павялічваюць вытворчасць, зрабіць так, каб гэта было бяспечна, - сказаў Данкверт. Ён працягнуў, што «рост імпарту рыбы і малочнай прадукцыі ў Беларусі не з'яўляецца звычайным або сезонным».

Кіраўнік Рассельгаснагляду адзначыў, што асноўным пакупніком малочнай прадукцыі з Польшчы ў верасні быў «Савушкін прадукт». Сярод беларускіх рыбных кампаній, якія рэзка павялічылі пастаўкі рыбы, Данкверт вылучыў «Санта-Брэмар». Калі ў ліпені кампанія паставіла ў Расею 752 тоны астуджанай і замарожанай рыбы і 324 тоны філе, то за 15 дзён верасня гэтыя паказчыкі ўжо дасягнулі 1,17 тысяч тон і 712 тон адпаведна.