Беларускі бразілец забіў шыкоўны гол у чэмпіянаце Партугаліі (Відэа)

1 верасня ў чэмпіянаце Партугаліі ў футболе адбыўся матч паміж «Рыу Авэ» і «Баавіштай».

Нагадаем, што нядаўна кантракт з «Рыу Авэ» заключыў Рэнан Брэсан. Пасля сыходу з барысаўскага БАТЭ у кар'еры бразільца з беларускім пашпартам наступіла чорная паласа. Ні ў Расеі, ні ў Казахстане зайграць яму так і не ўдалося, піша «Салiдарнасць».

Але, відавочна, у Партугаліі Рэнан Брэсан паступова вяртае былую кандыцыю. У адным з матчаў ён аддаў адразу чатыры галявыя перадачы. А ў гульні з «Баавіштай» адкрыў лік ударам са штрафнога.

Брэсан паклаў пачатак разгрому. «Рыу Авэ» здабыў перамогу з лікам 4:0 і пасля трох тураў узначальвае турнірную табліцу. Ва ўсіх матчах клуб Брэсана здабыў перамогі з агульнай розніцай мячоў 11:1! Таксама «Рыу Авэ» выйшаў у групавы раунд Лігі Еўропы, дзе адным з ягоных спаборнікаў будзе «Дынама» - праўда, не менскае, а кіеўскае.