«Разумныя» красоўкі дапамогуць знайсці шлях дадому (Відэа)

У Індыі бліжэйшым часам паступяць у шырокі продаж красоўкі, якія паказваюць правільны шлях да зададзенай кропкі.

Створаны яшчэ ў 2011 годзе смарт-абутак цяпер тэстуюць 50 супрацоўнікаў стартап-кампаніі, якую арганізавалі два прыяцелі - інжынеры Крыспіян Лоўрэнс і Аніруд Шарма.

Як піша «Расейская газета», красоўкі, якія выпускаюцца ў ярка-чырвоным колеры, вызначаюць месцазнаходжанне па GPS і кіруюцца па Bluetooth з дапамогай адмысловага прыкладання для смартфонаў. Неабходнасць змяніць кірунак уладальнік «разумных» красовак адчуе па вібрацыі левай ці правай ступні.

«Спачатку мы праверылі гэтую ідэю на сабе. Мы лёгка знайшлі патрэбны аб'ект, не зазіраючы ў карты і не пытаючыся мінакоў. Нам падалося, што такі абутак будзе карысным не толькі турыстам, але і людзям са слабым зрокам, а таксама дзецям. Яны змогуць арыентавацца на мясцовасці без якіх-небудзь аўдыё-, відэа-ці іншых фактараў, якія адцягваюць увагу. Праца красовак заснаваная на інстынктыўным кіраванні. Уявіце, што хтосьці паляпаў вас па правым плячы: вы цалкам натуральна павернецца ў гэты бок», - растлумачыў выданню The Times of India Крыспіян Лоўрэнс.

Слабым месцам смарт-абутку выпрабавальнікі назвалі працу ад звычайных батарэек і нярэдка страту Bluetooth-злучэння. Аднак распрацоўшчыкі запэўнілі, што ўжо шукаюць шляхі развязання праблем.

Прыкладны кошт «разумных» красовак Lechal (яны будуць прадавацца пад такой назвай, што ў перакладзе з хіндзі азначае «вазьмі мяне з сабой») складзе 100-150 даляраў ЗША. Ужо цяпер аўтары ідэі атрымалі папярэдні заказ на 25 тысяч пар, а да красавіка наступнага года Лоўрэнс і Шарма плануюць прадаць больш за 100 тысяч пар. Уладальнікі стартапа маюць намер аддаваць частку даходу на фінансаванне распрацоўкі абутку для людзей з абмежаванымі магчымасцямі.

Дадамо, што, акрамя навігацыйнага абутку, вядуцца работы і над іншымі відамі адзення - напрыклад створаны навігацыйны пінжак.