Менскі прадпрымальнік: Новыя забароны на мяжы могуць дзейнічаць гадамі

Улады спрабуюць абмежаваць перасоўванне тавараў праз мяжу.

Учора з'явілася інфармацыя аб спыненні пешаходнага руху на аўтадарожных пунктах пропуску на мяжы з Латвіяй, Літвой і Польшчай з беларускага боку. Улады сцвярджаюць, што пайшлі на гэты крок у сувязі з «недастатковым узроўнем бяспекі пешаходаў», і, як вынік, праз «шматлікія абгрунтаваныя звароты і скаргі грамадзян, у тым ліку замежных, а таксама крытычныя публікацый у СМІ», а таксама адзначаюць, што такія меры прымаюцца «часова, да завяршэння мерапрыемстваў па ўдасканаленні інфраструктуры пунктаў пропуску з улікам інтарэсаў пешаходнага руху».

Аднак гэта ўжо знервавала многіх беларусаў, якім даводзіцца часта перасякаць мяжу з ЕЗ. Так, у рэдакцыю charter97.org ужо патэлефанаваў малады прадпрымальнік з Менска, раззлаваны недарэчнай пастановай уладаў. З ягоных слоў, пераход мяжы пешшу ва ўмовах пастаянных чэргаў на пунктах пропуску быў самым зручным і самым хуткім. Цяпер, перакананы ён, гэта толькі ўскладніць ўсім жыццё.

- Я вельмі злы. Паколькі я часта перамяшчаюся праз мяжу пешшу, то магу заявіць, што менавіта гэты спосаб перасячэння мяжы з'яўляецца найбольш хуткім і зручным, у прыватнасці гэта датычыцца беларуска-літоўскай мяжы. Калі ты ідзеш пешшу, ты не стаіш у чарзе нідзе. Гэта было ўсім зручна. А калі на сайце Памежнага камітэта пішуць, што для пешаходаў няма ўмоў, яны адкрыта хлусяць. Бо праз пастаяннае павелічэння пешаходнага трафіку, напрыклад, на «Каменным Логу» ўжо ёсць спецыяльна абсталяванае акенца толькі для пешаходаў. Таксама зробленая пешаходная дарожка на беларускай тэрыторыі, так як на літоўскім баку яна існавала ўжо даўно.

- З чым, на вашу думку, могуць быць звязаныя абмежаванні для пешаходаў на мяжы з Еўразвязам?

- Пакуль наша ўлада імкнецца клапаціцца аб эканамічнай бяспецы Беларусі, у сутнасці гэтыя абмежавальныя дзеянні для пешаходаў - скажам, запаўненне дэкларацый, якое было ўведзена трохі раней, і вось гэтую часовую забарону на перамяшчэнне праз мяжу пешшу. Я больш чым упэўнены, што гэта будзе доўжыцца доўга: можа быць, паўгода, а можа быць нават некалькі гадоў. Гэта ўсё звязана выключна з тым, што нашы ўлады імкнуцца абмежаваць і забараніць перамяшчэнне тавараў і людзей праз мяжу.

- А чаму пешаходам забаранілі перасякаць мяжу менавіта цяпер?

- Я думаю, што ў мытні і ў памежным камітэце ёсць нейкая аналітыка, у якой яны ўбачылі, што нават нягледзячы на тое, што пешаходаў абавязваюць абавязкова дэклараваць асабістыя рэчы і пакупкі, гэта не зніжае трафіку. Нашы памежнікі і мытнікі глыбока ўпэўненыя, што найбольш часта парушэнні правілаў увозу тавараў, і алкаголю ў прыватнасці, адбываюцца сярод пешаходаў, гэта значыць яны ўяўляюць найбольшую небяспеку для эканамічнага дабрабыту нашай радзімы. Адпаведна, трэба прымаць меры - адпраўленне пешаходаў на «чырвоны канал» не дапамагло, і яны пастанавілі, маўляў, а давайце наогул забаронім. Але нідзе не абумоўленыя рамкі часовай забароны, бо яна ж можа доўжыцца і, хутчэй за ўсё, будзе доўжыцца гадамі.

- Хто, на вашу думку, пацерпіць ад новаўвядзенняў беларускага памежнага камітэта больш за ўсё?

- Існуюць пешаходныя пераходы для жыхароў памежных тэрыторый. Адпаведна, там вельмі многія перамяшчаюцца пешшу, таму што ў многіх сваякі па той бок мяжы. І для іх гэта створыць рэальную праблему. Напрыклад, у святы - на Каляды, на Дзяды, на Радаўніцу людзі не змогуць так проста патрапіць на могілкі да сваіх сваякоў. Цяпер, фактычна, атрымліваецца, што дзяржава адшуквае яшчэ адзін спосаб адабрання грошай у насельніцтва.

Так, трохі раней у гэтым месяцы з'явілася аператыўнае паведамленне ад аднаго з чытачоў charter97.org прама з мяжы з Літвой аб тым, што цяпер нават пешаходаў прымушаюць ісці праз чырвоны калідор і запаўняць дэкларацыі.