Выведка ЗША выявіла пагрозу больш сур'ёзную, чым «Ісламская дзяржава»

Сірыйская групоўка «Харасан» з’ўяўляецца больш сур'ёзнай пагрозай бяспецы ЗША, чым «Ісламская дзяржава».

Аб гэтым піша The New York Times са спасылкай на крыніцы ў выведцы і праваахоўных органах, паведамляе РБК.

Чыноўнікі распавялі выданню, што групоўка «Харасан», якая ўзнікла ў 2013 годзе, будзе, найбольш імаверна, накіраваная на ўчыненне тэрактаў у ЗША ды іншых краінах. Ёй кіруе былы паплечнік Асамы бін Ладэна - Мухсін аль-Фадлі, за галаву якога Дзярждэпартамэнт ЗША ў 2012 годзе прызначыў узнагароду $ 12 млн.

Мяркуецца, што аль-Фадлі быў адным з вузкага кола, хто ведаў пра падрыхтоўку тэракту ў Нью-Ёрку 11 верасня 2001года. Акрамя таго, ЗША, Савудаўская Арабія і Кувэйт падазраюць яго ў фундаванні «Аль-Кайды» і забеспячэнні ваеўнікамі-навабранцамі ісламісцкіх груповак у Сірыі, Іраку і Афганістане.

Суразмоўцы газэты адзначаюць, што «Харасан» можа складацца з чальцоў «Аль-Кайды» з Блізкага Ўсходу, а таксама з Паўночнай Афрыкі і Паўднёвай Азіі. Пры гэтым пакуль застаецца незразумелым, хто ўваходзіць у склад групоўкі акрамя самога аль-Фадлі.

Паводле звестак амэрыканскай выведкі, цяпер 33-гадовы аль-Фадлі знаходзіцца ў Сірыі. Раней ён доўгі час пражываў у Іране разам з невялікай групай ваеўнікоў «Аль-Кайды», якія ўцяклі ў гэтую краіну з Афганістана пасля тэракту 11 верасня. Урад Ірана сцвярджаў, што ваеўнікі знаходзяцца пад хатнім арыштам, але дакладныя абставіны іхняга знаходжання ў краіне нікому не вядомыя. Пакрысе шмат хто з іх перабраўся ў Пакістан, Сірыю ды іншыя дзяржавы.

Дырэктар Нацыянальнай выведкі ЗША Джэймс Клэпэр выказаў меркаванне, што «з пункту гледжання пагрозы на нашай [амэрыканскай] тэрыторыі «Харасан» можа мець такую ж небяспеку, як і «Ісламская дзяржава». Прадстаўнікі Белага дома і ЦВА ад камэнтароў адмовіліся.

Былы высокапастаўлены чыноўнік з ліку амэрыканскіх вайскоўцаў заявіў, што ў Сірыю з усяго свету з'язджаюцца ваеўнікі і ствараюць «нефармальныя» групоўкі ў раёнах, якія не кантралююцца нікім, у тым ліку «Ісламскай дзяржавай» і «Фронтам ан-Нусра», некалі самай баяздольнай адзінкай сірыйскіх ісламістаў.

Экспансія «Ісламскай дзяржавы» на Блізкім Усходзе, піша газэта, падважыла моц «Фронту ан-Нусра», мноства ваеўнікоў якога перайшлі да «канкурэнтаў», што здзейснілі іхнюю даўнюю мару - абвяшчэнне «халіфата». Шэраг амэрыканскіх чыноўнікаў уважаюць «Харасан» за філію «Фронту ан-Нусра».

Аналітык вашынгтонскага Інстытута вывучэння вайны Джэніфэр Кафарэла мяркуе, што ўдары ВПС ЗША па пазіцыях ваеўнікоў «Ісламскай дзяржавы» могуць прынесці карысць «Фронту ан-Нусра», калі Вашынгтон не падрыхтуе глебу для сілы, якая будзе гатовая ўзяць у свае рукі ўладу на вызваленай ад ісламістаў тэрыторыі.

Прэзідэнт ЗША Барак Абама 11 верасня заявіў, што Амерыка збірае шырокую кааліцыю дзяржаў для барацьбы з ІДІЛ. Пры гэтым ЗША не ладзяцца праводзіць наземную аперацыю, але гатовыя наносіць авіяўдары па пазіцыях ваеўнікоў як у Іраку, так і ў Сірыі. Да 11 верасня ВПС ЗША нанеслі блізу 150 удараў па месцах дыслакацыі тэрарыстаў.

«Ісламская дзяржава» - тэрарыстычная ісламісцкая арганізацыя, утвораная ў 2006 годзе, якая аб'явіла сваёй мэтай стварэнне суніцкай дзяржавы на тэрыторыі Сірыі, Лібіі ды Ірака. Хрыбет арганізацыі склалі больш за 10 радыкальных ісламісцкіх груп, якія аб'ядналіся вакол мясцовай суполкі «Аль-Кайды».

У 2013 годзе ваеўнікі ІДІЛ пачалі вайну, выступіўшы на баку антыўрадавых сіл у Сірыі. Улетку 2014 года яны распачалі шырокі наступ у Іраку, захапіўшы гарады Тыкрыт і Масул і падышоўшы ўсутыч да Багдаду.

30 чэрвеня 2014 года ваеўнікі абвясцілі аб стварэнні «халіфата» у захопленых імі рэгіёнах Сірыі і Ірака. Кіраўніком дзяржавы і «лідэрам усіх мусульман» ісламісты абралі свайго камандзіра Абу Бакра Аль-Багдадзі. Тэрыторыя «халіфата» сягае ад сірыйскага горада Алепа да ірацкай правінцыі Дыяла.