Ізраільскія СПА збіла над Галанскімі вышынямі сірыйскі знішчальнік

Сілы супрацьпаветранай абароны Арміі абароны Ізраіля збілі баявы самалёт ВПС Сірыі.

Знішчальнік парушыў паветраную прастору габрэйскай дзяржавы, паведаміла вайсковая прэс-служба. З яе інфармацыі, 23 верасня а 9:00 самалёт перасёк мяжу з Ізраілем і неўзабаве быў збіты батарэяй Patriot у раёне Кунейтры на Галанскіх вышынях, паведамляе NEWSru Israel.

Паводле звестак армейскай радыёстанцыі «Галяй ЦАХАЛ», гаворка ідзе пра знішчальнік МіГ-21, які, як мяркуецца, браў удзел у нападах на пазіцыі праціўнікаў сірыйскага прэзідэнта Башара Асада ў раёне КПП «Кунейтра» на мяжы Сірыі і Ізраіля.

Ізраільскі міністр абароны Машэ Яалон заявіў, што «самалёт спачатку пагрозліва наблізіўся да нашай мяжы, а затым перасёк яе». Пры гэтым ён паабяцаў «жорстка рэагаваць на любую спробу паквапіцца на наш суверэнітэт, і тут усё роўна, ці ідзе гаворка пра памылку або аб злым намеры».

Некаторыя ізраільскія СМІ паведамілі са спасылкай на неназваныя вайсковыя крыніцы, што баявы самалёт Сірыі мог перасекчы паветраную мяжу Ізраіля праз памылку.

Лёс пілота збітага самалёта пакуль не ясны. ЦАХАЛ паведамляе, што прыступіў да праверкі абставінаў інцыдэнту.

У мінулы раз сірыйскі вайсковы самалёт быў збіты над тэрыторыяй Ізраіля амаль тры дзесяткі гадоў таму - 19 лістапада 1985 г.