Гурт «Звери» не ведае аб сваім «канцэрце» ў Баранавічах
4- 23.09.2014, 12:46
- 9,853
Нягледзячы на тое, што расейскі гурт не збіраецца выступаць у Баранавічах, квіткі на ягоны канцэрт прадаюцца.
Абвестка пра канцэрт гурту «Звери», які нібыта павінен адбыцца 25 кастрычніка ў Баранавіцкім Лядовым палацы, размешчаная на сайце арганізатара - Гарадзенскай абласной філармоніі. У касах нашага Лядовага палаца ўжо прадаюцца квіткі на канцэрт - ад 180 тысяч на танцпол і да 300 тысяч за месцы ў цэнтры залы, піша Intex-press.
Аднак на афіцыйным сайце музычнага калектыву «Звери» ў афішы горад не паказаны. Анансаваныя толькі выступы ў Віцебску, Магілёве і Гомелі 20-22 кастрычніка.
Арганізатар канцэртаў і прэс-сакратар групы «Звери» Лера Агапава паведаміла, што ўпершыню чуе пра канцэрт у Баранавічах і ніякіх выступаў у нас там не планавалася.
- Да нас ніхто не звяртаўся з нагоды арганізацыі канцэртаў у Баранавічах, - патлумачыла Агапава. - Калі ў вас ужо прадаюцца квіткі, то хай «арганізатары» рыхтуюцца да крымінальнай справы.
Намеснік дырэктара ў агульных пытаннях Гарадзенскай абласной філармоніі Андрэй Занеўскі не змог растлумачыць, чаму афіцыйныя прадстаўнікі гурту «Звери» не ведаюць пра канцэрт у Баранавічах, які арганізавала філармонія. З ягоных слоў, арганізацыяй канцэрта займалася дырэктарка філармоніі, якая «цяпер у адпачынку».
Дарэчы, нашаму гораду падобныя канфузы з выступленнямі вядомых калектываў ужо не ў навіну. Многія баранавіцкія гледачы памятаюць расчараванне ад канцэрту «Дыскатэка 80-х», які прайшоў 27 траўня.