Клімкін абмеркаваў з Хілары Клінтан сітуацыю ва Украіне і справу Саўчанкі
- 24.09.2014, 12:16
- 4,474
Міністр замежных спраў Украіны Павел Клімкін знаходзіцца ў Нью-Ёрку на Генасамблеі ААН.
Кіраўнік МЗС Украіны Павел Клімкін правёў у Нью-Ёрку сустрэчу з экс-кіраўніцай Дзярждэпартамента ЗША Хілары Клінтан.
Пра гэта чыноўнік напісаў у «Твітэры».
«Доўгі дзень. Супер сустрэча з Хілары Клінтан. Выразна разумее нашу сітуацыю і што трэба рабіць. Пагаварыў з ёй і аб Саўчанцы», - заявіў міністр.
Надзея Саўчанка, старшы лейтэнант Узброеных сіл Украіны, у антытэрарыстычнай аперацыі ў Данбасе брала ўдзел у якасці добраахвотніка батальёна «Айдар». Удзельнічала ў баях пад Луганскам, дзе трапіла ў палон тэрарыстаў 18 чэрвеня. 8 ліпеня стала вядома, што Саўчанка знаходзіцца пад вартай у Расеі ў варонежскай СІЗА. Расейскія ўлады інкрымінуюць ёй дачыненне да гібелі на ўсходзе Украіны двух расейскіх журналістаў - Ігара Карнелюка і Антона Валошына.