Расея пагражае забаронай паставак мяса і малака з Беларусі

«Рассельгаснагляд» не выключае забароны паставак прадукцыі жывёлагадоўлі з Беларусі.

Фармальнай прычынай можа стаць «выяўленне шкодных рэчываў у прадукцыі шэрагу прадпрыемстваў», паведамляе «Інтэрфакс».

«На наступным тыдні мы прапануем нашым беларускім калегам правесці перамовы, каб абмеркаваць вынікі маніторынгу беларускай прадукцыі за 9 месяцаў з улікам неабходнасці прыняцця мер, уключаючы ўвядзенне абмежаванняў на пастаўкі», - заявіў кіраўнік «Рассельгаснагляду» Сяргей Данкверт.

З ягоных слоў, парушэнні выяўленыя ў малочнай прадукцыі кампаній «Бабушкина крынка» (антыбіётыкі тэтрацыклінавай групы, мезафільныя аэробныя і факультатыўна-анаэробныя мікраарганізмы), «Савушкін прадукт» (бактэрыі групы кішачнай палачкі), «Біякам» (падвышаная бакабсемяненне).

«Актыўны маніторынг працягваецца, відавочна будуць яшчэ вынікі», - сказаў ён.

Як заявіў Сяргей Данкверт, сярод вытворцаў мясной прадукцыі пад падазрэннем знаходзяцца Бабруйскі, Бярозаўскі, Берасцейскі, Магілёўскі мясакамбінаты, Віцебская бройлерная птушкафабрыка, «Белавежскія дэлікатэсы», агракамбінат «Дзяржынскі» і некаторыя іншыя прадпрыемствы, прадукцыя якіх не адпавядае патрабаванням.

Сяргей Данкверт таксама паведаміў, што на перамовах плануецца абмеркаваць і магчымасць працы расейскіх спецыялістаў разам з беларускімі на мяжы Мытнага саюза.

«У сувязі з тым, што ёсць выпадкі паставак забароненай прадукцыі з ЕЗ праз Беларусь, мы прапанавалі беларускім калегам праводзіць кантроль на знешняй мяжы Мытнага саюза, але нам два тыдні адмаўляюць», - заявіў кіраўнік «Рассельгаснагляду».