Сікорскі ачоліў Сейм Польшчы
- 24.09.2014, 17:06
- 3,516
За новае прызначэнне экс-кіраўніка польскага МЗС аддалі галасы 233 дэпутаты пры 220 неабходных для прыняцця пастановы.
Былы міністр замежных спраў Польшчы Радаслаў Сікорскі сёння быў абраны старшынём ніжняй палаты польскага парламента - Сейма.
Як паведамляе карэспандэнт УНІАН з Польшчы, за прызначэнне Сікорскага на гэтую пасаду аддалі галасы 233 дэпутата пры 220 неабходных для прыняцця пастановы. Супраць Сікорскага прагаласавалі 143 дэпутаты і 62 устрымаліся ад галасавання.
«Дзякую фракцыі, якія не вылучылі іншага кандыдата на маршалка (старшыню Сейма). Дзякую тым, хто за мяне прагаласаваў і тым, хто яшчэ не паверыў у маю кандыдатуру. Я хачу атрымаць давер дзеяннямі, а не прамовамі», - сказаў новапрызначаны старшыня галоўнай заканадаўчай палаты польскага парламента.
Ён звярнуў увагу, што палякі горш за ўсё ацэньваюць дзейнасць Сейма з усіх дзяржаўных органаў, адзначыўшы, што гэта сведчыць пра тое, што вострыя дыскусіі, якія тут вядуцца, не выклікаюць даверу грамадзян і гэта трэба змяніць.
«Атмасфера канфрантацыі, якая тут пануе, не толькі не спрыяе стварэнню законаў, але таксама не дадае нам папулярнасці. Гэта для кожнага з нас павінна стаць падставай для аўтарэфлексіі. Падчас кожнага свайго выступу мы павінны паказваць, што знаходзімся тут, каб развязваць, а не ствараць праблемы», - адзначыў Сікорскі, і дадаў, што давяраюць Сейму ўсяго 18% палякаў.
Нагадаем, 51-гадовы Сікорскі пакінуў пасаду міністра замежных спраў, якую ён займаў з восені 2007 года, у пачатку гэтага тыдня пасля прызначэння новага Кабінета міністраў. Ён ствараўся ў сувязі з прызначэннем папярэдняга прэм'ера Дональда Туска старшынём Рады Еўразвяза.
Фота: Photothek