Затрыманая ў Непале беларуска вызваленая
6- 24.09.2014, 21:32
- 11,955
Больш за тыдзень правяла ў непальскай турме 25-гадовая жыхарка Барысава Вольга Каптур.
Напярэдадні пастановай суда яна была вызваленая, піша БелаПАН.
Вольга Каптур прыехала ў Непал валанцёркай - разам з іншымі добраахвотнікамі дапамагала будаваць школу і вучыць мясцовых дзяцей ангельскай мове. Са слоў дзяўчыны, у яе скончыўся тэрмін візы, але праз сезон дажджоў яна не здолела своечасова пакінуць краіну і таму наважыла самастойна выправіць тэрмін дзеяння візы на 3 месяцы.
Вольгу затрымалі ў аэрапорце Катманду. Паводле мясцовых законаў, за падробку дакументаў можна атрымаць да пяці гадоў турмы, аднак пасля ўмяшання беларускіх дыпламатаў атрымалася змякчыць прысуд. Суддзя прызначыў беларусцы штраф у 10 000 рупій (блізу тысячы даляраў), а таксама па 5 даляраў за кожны пратэрмінаваны дзень візы.
Сёння ў дэпартаменце міграцыі Непала павінны вызначыць тэрмін дэпартацыі. Ужо гэтым вечарам Вольгу Каптур могуць адправіць дадому.