У Менску праз шматдзетныя сем'і перагледзелі планы будаўніцтва жылля

Новых дамах знойдуць дадатковыя месцы, а трох- і чатырохпакаёвых кватэр будзе больш.

У сталіцы гатовая і на днях будзе прынятая новая трохгадовая праграма ў будаўніцтве дамоў для шматдзетных сем'яў. У дадатак да існуючых планаў забудовы, у сталіцы выдзеляць некалькі ўчасткаў і ўзвядуць жыллё спецыяльна для вялікіх сем'яў, піша «Комсомольская правда в Беларуси».

Што здарылася, чаму так тэрмінова карэктуюць будаўнічыя планы сталіцы? Нечакана менчукі перасягнулі чаканні гарадскіх уладаў у нараджальнасці. Гэта ў будаўнікоў планы вярстаюцца на некалькі гадоў наперад, а ў сям'і яны могуць мяняцца спантанна: планавалі адно дзіцяці, а глядзіш - ужо гадуюць траіх. У сям'і радасць, а будаўнікам - праблема.

- У горадзе не аказалася столькі магчымасцяў для будаўніцтва дамоў, колькі трэба цяпер для забеспячэння шматдзетных сем'яў, - прызнаў кіраўнік адміністрацыі Фрунзенскага раёна Барыс Васільеў падчас прамой тэлефоннай лініі з жыхарамі раёна, дзе пражывае больш за ўсё шматдзетных сем'яў. - Праграма ўзвядзення жылля вярстаецца на некалькі гадоў наперад, і не заўсёды прагназаваныя лічбы супадаюць з рэальнай колькасцю шматдзетных сем'яў, што ўтварыліся.

Для развязвання праблемы кіраўніцтва Менгарвыканкама шукае дадатковыя пляцоўкі, на якіх вырастуць дамы для шматдзетных. Задача няпростая, гэта ж павінна быць больш таннае будаўніцтва, таму і тэрыторыі стараюцца падбіраць такія, каб не трэба было нічога зносіць, каб меліся інжынерныя сеткі і гэтак далей.

Мэр Менска Мікалай Ладуцька даручыў прапрацаваць яшчэ і магчымасць будаўніцтва дамоў, дзе частка пад'ездаў будзе складацца з трох- і чатырохпакаёвых кватэр.

- Раней праектавалася і будавалася менш чатырохпакаёвых кватэр, таму што яны карыстаюцца меншым попытам, чым адна- або двухпакаёвыя, і рэалізаваць іх складаней, - растлумачыў Аляксандр Аўраменка, начальнік упраўлення жыллёвай палітыкі Менгарвыканкама. - Каб выйсці са становішча і вылучыць кватэру для шматдзетнай сям'і, часам аб'ядноўвалі двух- і аднапакаёвыя кватэры. Цяпер, улічваючы мінулы досвед, вырашылі адразу праектаваць больш кватэр, якія падыдуць шматдзетным сем'ям, зыходзячы з нарматыву 20 кв м на чалавека.

Жыццё ў доме, дзе ў кожнай сям'і як мінімум трое дзяцей, сумным дакладна не будзе. А як наконт камфорту? Бо і ўзровень шуму на парадак вышэйшы, і месцы для вазкоў і ровараў трэба больш.

- А я станоўча стаўлюся да такога варыянту, - кажа шматдзетная мама Яна. - Калі па суседстве жыве сям'я з дзецьмі, то прынцыповай розніцы няма - трое іх ці адзін. Адзінае, што хвалюе, - ці будзе побач з такімі дамамі створаная інфраструктура: дзіцячыя садкі, школы, крамы, паліклінікі, дзіцячыя пляцоўкі, роварныя паркоўкі.

Застаецца, праўда, пытанне, ці захаваюцца такія тэмпы будаўніцтва ў будучыні. Бо гадоў праз 20 у кватэры ўжо будуць жыць «дзеткі», гатовыя да стварэння ўласных сем'яў.