Пеня за пратэрміноўку камунальных плацяжоў вырасце ў 100 разоў

Менгарвыканкам прапануе павялічыць пеню за пратэрміноўку плацяжоў за камунальныя паслугі ў сто разоў.

Пра гэта паведаміў намеснік старшыні Менгарвыканкама Уладзімір Кухараў 25 верасня на пасяджэнні гарадскога выканаўчага камітэта, прысвечаным мерам павышэння эфектыўнасці і ўдасканалення работы прадпрыемстваў жыллёвай гаспадаркі.

Як паведаміла агенцтва «Менск-Навіны», Кухараў прапанаваў змагацца з даўжнікамі за аказаныя жыллёва-камунальныя паслугі пры дапамозе павелічэння сумы пені за такое парушэнне.

- З гэтай мэтай перад ГА «Менская гарадская жыллёвая гаспадарка» пастаўлена задача звярнуцца ў Міністэрства жыллёва-камунальнай гаспадаркі для разгляду магчымасці ўнясення змяненняў у пастанову Саўміна ад 2014/06/12 № 571 у частцы павышэння да 30% сумы пені за пратэрміноўку ўнясення грамадзянамі плацяжоў паводле квітка, - паведаміла агенцтва.

На гэты момант, згодна з існуючым дакументам, плацельшчыкі ЖКП, якія несвоечасова або не ў поўным аб'ёме ўнеслі плату за жыллёва-камунальныя паслугі, выплачваюць пеню ў памеры 0,3% ад не выплачанай ва ўстаноўлены тэрмін сумы гэтых плацяжоў за кожны дзень пратэрміноўкі.