Прыхільнікі федэралізацыі Кубані абвешчаныя ў РФ тэрарыстамі

Маладыя людзі вымушаныя бегчы з краіны.

Прыхільнікаў «федэралізацыі Кубані» Дар'ю Полюдаву, Пятра Любчанкова і Вячаслава Мартынава ўнеслі ў Федэральны спіс экстрэмістаў і тэрарыстаў Расфинманіторынгу, што пазбавіла іх магчымасці карыстацца паслугамі расейскіх банкаў.

Пра гэта паведамляе сайт праекту «АУС-Інфа», які займаецца дапамогай затрыманым на акцыях.

Паводле дадзеных «АУС-Інфа», Полюдава цяпер знаходзіцца ў СІЗА ў Краснадары, яе арыштавалі ў канцы жніўня. Яна займалася арганізацыяй «Маршу за федэралізацыі Кубані», запланаванага на 17 жніўня. Незадоўга да гэтага дня актывістку затрымалі на падазрэнне ў дробным хуліганстве і прызначылі ёй пакаранне ў выглядзе адміністрацыйнага арышту. Пасля адбыцця пакарання Полюдава не выйшла з СІЗА.

Пазней стала вядома, што супраць актывісткі распачалі крымінальныя справы паводле двух пунктаў артыкула 280 КК РФ - «публічныя заклікі да ажыццяўлення экстрэмісцкай дзейнасці, учыненыя ў сетцы Інтэрнэт» і «публічныя заклікі да ажыццяўлення дзеянняў, накіраваных на парушэнне тэрытарыяльнай цэласнасці Расейскай Федэрацыі, учыненыя з выкарыстаннем сеткі Інтэрнэт».

Любчанка і Мартынаў цяпер знаходзяцца ва Украіне. Любчанка распавёў «АУС-Інфа», што каля тыдня таму ягоная карта «Ашчадбанка» і рахунак на «Яндэкс.Грошы» былі заблакаваныя. Як адзначае «АУС-Інфа», унясенне ў Федэральны спіс канчаткова пацвердзіла, што Любчанка і Мартынаў - гэта тыя самыя фігуранты новай крымінальнай справы супраць «кубанскіх сепаратыстаў», распачатай 10 верасня следчым аддзелам краснадарскага УФСБ.

Тады ў ведамстве распавялі, што пад следствам знаходзяцца двое жыхароў Краснадара, аднак не ўдакладнілі іх імёны і прававы статус. Таксама пракуратура краю падала запыт аб блакаванні выяўленай «сепаратысцкай» інфармацыі.