Украінскага рэжысёра Сянцова пакідаюць у маскоўскай турме

Лефортаўскі суд Масквы прыняў пастанову аб падаўжэнні тэрміну ўтрымання пад вартай да 11 студзеня 2015 года.

Пра гэта паведамляе РІА «Новости».

«Суд задаволіў хадайніцтва следства аб працягу Сянцову меры стрымання ў выглядзе ўтрымання пад вартай яшчэ на тры месяцы», - адзначыў прэс-сакратар суда.

Раней міністр замежных спраў Украіны Павел Клімкін заявіў, што ўлады краіны будуць дамагацца вызвалення рэжысёра Алега Сянцова.

11 траўня супрацоўнікі ФСБ затрымалі ўкраінскага рэжысёра Алега Сянцова ў Крыме. 19 траўня з'явілася інфармацыя аб тым, што ён пераведзены ў маскоўскі следчы ізалятар. Раней суд адхіліў хадайніцтва абароны Сянцова аб незаконнасці яго затрымання.

Паводле версіі ФСБ, рэжысёр уваходзіў у склад дыверсійна-тэрарыстычнай групоўкі «Правага сектара», якая нібыта планавала тэракты ў Крыме, у прыватнасці, у Сімферопалі, Ялце і Севастопалі.

Сянцову пагражае да 20 гадоў пазбаўлення волі. Адвакат рэжысёра раней паведаміў, што ў крымскім следчым ізалятары яго падапечнага катавалі.