Каламойскі: Увесну будзе новы наступ Расеі

Губернатар Днепрапятроўскай вобласці Ігар Каламойскі заклікаў пабудаваць загароды ўздоўж усёй украіна-расейскай мяжы.

«Пасля шматмесячных баёў, у выніку якіх армія Украіны моцна скарацілася, Каламойскі ўмацоўвае абарону сваёй вобласці нашмат заходней тых месцаў, дзе спачатку прапанаваў пабудаваць сцяну, - на выпадак, калі апалчэнцы, якіх падтрымлівае Масква, прарвуцца яшчэ глыбей на тэрыторыю Украіны», - піша журналіст Алан Кулісан на старонках The Wall Street Journal (пераклад - Inopressa.ru).

Каламойскі таксама выказвае непакой, што размежавальныя лініі, праведзеныя ў мэтах выканання дамоўленасці аб спыненні агню, каб аддзяліць урадавыя войскі ад паўстанцаў, стануць перманентнымі. «З ягоных слоў, у выніку на мяжы ягонай вобласці можа паўстаць фактычная дзяржава паўстанцаў і сфармуецца так званы» замарожаны канфлікт «тыпу тых, якія Расея выкарыстоўвала для ціску на іншыя постсавецкія рэспублікі», - гаворыцца ў артыкуле.

Каламойскі сказаў, што ўхваляе «мірнае пагадненне, пра якое прэзідэнты Парашэнка і Пуцін дамовіліся ў Менску ў гэтым месяцы» (фармулёўка аўтара артыкула). Але ўхваляе ён яго таму, што не бачыць альтэрнатывы. «Гэта лепшае, на што мы можам спадзявацца, - сказаў Каламойскі ў інтэрв'ю. - Мы змагаемся за існаванне».

На думку карэспандэнта, той факт, што Каламойскі паменшыў маштаб сваіх планаў, адлюстроўвае стомленасць ад вайны на Украіне «пасля сведчанняў больш прамога ўмяшання расейскіх сіл у жніўні», піша Кулісан. Бо Захад не вылучае вайсковую дапамогу, у Кіева застаецца толькі адзін шанец на вяртанне Данецкай і Луганскай абласцей - спыненне агню і перамовы.

«Але паўстанцы, падобна, не зацікаўленыя ў рэінтэграцыі з Кіевам», - доўжыць аўтар. Яны адмаўляюцца ўдзельнічаць у парламенцкіх выбарах і плануюць уласныя выбары ў лістападзе.

На перамовах у Менску першапачаткова абмяркоўвалася стварэнне буфернай зоны ўздоўж расейска-ўкраінскай мяжы. «Аднак сёння на перамовах робіцца ўпор на лініі, якія нашмат заходней - лініі судакранання паўстанцаў і ўкраінскіх войскаў», - сцвярджае журналіст. На мінулым тыдні Кіеў загадаў закрыць мяжу, але афіцыйныя асобы прызнаюць, што ніякім спосабам не могуць гэтага дамагчыся.

Каламойскі мяркуе: бліжэйшымі месяцамі разлютаваных баёў не будзе, таму што бакі не хочуць сутыкацца з праблемай бежанцаў у зімовы перыяд, але вясной верагоднасць новага наступу ўзрасце. Каламойскі спадзяецца, што да таго часу ўкраінскае войска будзе перааснашчанае. Ён пачаў вытворчасць беспілотнікаў-шпіёнаў у Днепрапятроўску, гаворыцца ў артыкуле.