Помнік Мулявіну ўсталююць у Екацярынбургу 6 кастрычніка

Помнік народнаму артысту і заснавальніку беларускага ансамбля "Песняры" Уладзіміру Мулявіну ўсталююць на яго радзіме ў Екацярынбургу 6 кастрычніка.

Пра гэта паведаміў БелТА кіраўнік екацярынбургскага аддзялення пасольства Беларусі ў Расеі дарадца Віктар Палянін.

Першапачаткова ўрачыстую цырымонію планавалася правесці 29 верасня. Са слоў дыпламата, перанос даты звязаны са зменамі ў працоўным графіку губернатара Свярдлоўскай вобласці Яўгена Куйвашава, які мае намер асабіста ўзяць удзел у адкрыцці помніка Уладзіміру Мулявіну.

Кампазіцыя створаная паводле праекта беларускага скульптара Сяргея Логвіна. Чатырохметровая скульптура адлюстроўвае артыста ў сцэнічным касцюме і з электрагітарай у руках.

Помнік будзе ўсталяваны ў цэнтры Екацярынбурга на алеі, якая вядзе да білетных кас кінаканцэртнага тэатра "Космас". У 2013 годзе на екацярынбургскай "Плошчы зорак" была закладзеная імянная пліта Уладзіміра Мулявіна.