З'явілася першае фота з месца катастрофы Су-25 пад Лідай

Паводле факта катастрофы СУ-25 распачатая крымінальная справа ў ч.1 арт.465 КК РБ (парушэнне правілаў палётаў і падрыхтоўкі да іх).

Высвятляюцца ўсе абставіны здарэння, праводзяцца неабходныя следчыя дзеянні, паведамілі сайту charter97.org у прэс-службе Следчага камітэта.

Таксама была апублікаваная першая фатаграфія з месца катастрофы.

Нагадаем, 30 верасня ў Лідскім раёне пры правядзенні планавых палётаў пры выкананні практыкавання (палёт у зоне) блізу 11.50 самалёт Су-25 116 штурмавой авіяцыйнай базы ВПС і войскаў СПА ў выніку няштатнай сітуацыі страціў кіраванне.

Лётчык, пераканаўшыся, што траекторыя падзення самалёта знаходзіцца па-за населеным пунктам, катапультаваўся і быў знойдзены сіламі пошукава-выратавальнай каманды. Ахвяр і разбурэнняў няма. Пілот не пацярпеў.

У гэты момант у Беларусі спыненыя палёты ўсіх Су-25 да высвятлення прычын катастрофы.