Мясніковіч знайшоў новага «перспектыўнага партнёра» ў Паўднёвай Азіі

Прэм'ер-міністр Беларусі Міхаіл Мясніковіч сустрэўся 3 верасня з дэлегацыяй Народнай Рэспублікі Бангладэш.

Яе ўзначаліў старшыня праўлення Карпарацыі сельскагаспадарчага развіцця BADC Анварул Іслам Сікдэр. У яе склад увайшлі таксама прадстаўнікі Міністэрства сельскай гаспадаркі. Пра гэта сайту charter97.org паведамілі ў прэс-службе ўрада.

Міхаіл Мясніковіч заявіў, што Беларусь разглядае Бангладэш у якасці перспектыўнага партнёра ў рэгіёне Паўднёвай Азіі. «Практычна развязанае пытанне аб пастаўцы буйной партыі беларускай тэхнікі ў Бангладэш да канца гэтага года. Можна сказаць нават больш: ва ўсіх сельскагаспадарчым пытаннях, у пастаўках сельскагаспадарчай тэхнікі, ведаў і тэхналогій Беларусь гатовая супрацоўнічаць і ўсебакова падтрымліваць», - заявіў Міхаіл Мясніковіч.

Ён таксама запэўніў, што Беларусь гатова нарасціць аб'ёмы паставак калійных угнаенняў да поўнага задавальнення патрэбаў Бангладэш, у тым ліку ў рамках доўгатэрміновых узаемавыгадных кантрактаў. У прыватнасці, Беларуская калійная кампанія (БКК) і бангладэшскія карпарацыя BADC падпісалі 2 верасня 2 кантракты на пастаўку ў Бангладэш блізу 120 тыс тон калійных угнаенняў на суму 40 млн даляраў.

Бангладэшская дэлегацыя, у сваю чаргу, паведаміла аб зацікаўленасці ў адкрыцці ў нашай краіне гандлёвай палаты. Паколькі ў Бангладэш вялікае развіццё атрымала фармацэўтычная галіна, яе кампаніі гатовы пастаўляць сваю прадукцыю на беларускі рынак.

Удзельнікі сустрэчы дамовіліся надалей весці ўзаемавыгаднае супрацоўніцтва ў розных галінах і абмяняцца прапановамі ў зацікаўленых пытаннях.

Бангладэш - адна з самых бедных дзяржаў у Азіі. У сельскай гаспадарцы працуе 63% насельніцтва. Вільготны трапічны клімат дазваляе займацца сельскай гаспадаркай круглы год, хоць на захадзе краіны бываюць засухі. Жыхары вырошчваюць рыс, джут, чай (на паўночным усходзе), пшаніцу, цукровы трыснёг, бульбу, тытунь, бабовыя, сланечнік, вострыя прыправы, садавіну (у тым ліку манга). Насельніцтва перыядычна пакутуе ад голаду праз павадкі, што знішчаюць пасевы рысу.