Жыхар Полацка друкаваў беларускія рублі на прынтары

Міліцыя затрымала палачаніна, які надрукаваў купюры Br200 тысяч на бытавым прынтары і спрабаваў расплаціцца імі ў краме.

Пра гэта паведамілі charter97.org у прэс-службе МУС Беларусі.

«Гэты чалавек раней быў судзімы за рабаванне і крадзеж. Нядаўна ён вызваліўся з месцаў пазбаўлення волі і перабіваўся выпадковымі заробкамі. Яму ўдалося зарабіць Br200 тыс. На продажы сабранай ім брусніцы. З гэтымі грашыма мужчына зайшоў да свайго знаёмага, таксама раней судзімага, але ўжо за незаконны абарот наркатычных сродкаў. У яго ён адсканаваў банкноту і раздрукаваў копіі на каляровым прынтары. Запусціў працэс яшчэ некалькі разоў. Усе купюры атрымаліся з аднолькавымі серыйнымі нумарамі», - распавялі ў МУС.

Затым мужчына расплаціўся фальшыўкай ў краме. «Зрабіўшы пакупкі, ён узрадаваўся, што ніхто не заўважыў і усё сышло для яго добра. Аднак пазней пры пераліку грошай прадавец устанавіла, што купюра фальшывая. Паведаміла ў міліцыю, падаўшы прыкладныя прыкметы таго, хто мог яе збыць», - растлумачылі ў міліцыі. Мужчына быў затрыманы пры паўторным наведванні гэтай крамы, дзе ён спрабаваў расплаціцца падробленымі грашыма за спіртное і прадукты.

Пры асабістым вобшуку ў затрыманага знайшлі тры фальшывыя грашовыя купюры наміналам Br200 тыс. Вядзецца следства.