«Газпром нефть», «Транснефть» і «Роснефть» патрапяць пад санкцыі ЕЗ
6- 8.09.2014, 8:40
- 17,013
Тры найбуйнейшыя расейскія кампаніі патрапяць у «чорны спіс» ЕЗ.
Яны не змогуць пазычаць сродкі на рынках капіталу. Згодна са звесткамі, якія маюцца ў распараджэнні амерыканскай газеты The Wall Street Journal, у санкцыйны спіс увойдуць тры асноўныя дзяржаўныя нафтавыя кампаніі - «Газпром нефть», «Транснефть» і «Роснефть». Ім будзе забаронена браць пазыкі ў ЕЗ з тэрмінам пагашэння больш за 30 дзён, піша Lenta.ru.
Акрамя таго, для пяці банкаў, якія кантралююцца дзяржавай, якім цяпер забаронена працаваць з еўрапейскімі пазыковымі прыладамі з тэрмінам пагашэння звыш 90 дзён, дадзены тэрмін будзе скарочаны да 30 дзён. Гаворка ідзе пра крэдытныя установы, у дачыненні да якіх ЕЗ увёў санкцыі ў канцы ліпеня, - гэта «Сбербанк», «Россельхозбанк», «Газпромбанк», «Внешэкономбанк» і ВТБ.
Акрамя таго, будзе забаронена прыцягваць сродкі на фінансавых рынках ЕЗ такім кампаніям абароннага сектара, як «Оборонпром», «Объединенная авиастроительная корпорация» (ОАК) і «Уралвагонзавод»
Санкцыі таксама забараняюць заключаць новыя кантракты на паслугі, неабходныя для глыбакаводнай разведкі і здабычы нафты, праектаў у Арктыцы, а таксама праектаў у здабычы сланцавай нафты.
Акрамя таго, уведзеныя абмежаванні прадугледжваюць забарону на продаж дзевяці расейскіх кампаній, якія надаюць паслугі для расейскіх вайскоўцаў, тэхналогій падвойнага прызначэння. Адпаведны спіс уключае ў сябе вытворцу электронна-аптычнага абсталявання ААТ «Сириус», машынабудаўнічае прадпрыемства ААТ «Станкоинструмент», а таксама вытворцу стралковай зброі ААТ «Калашников».
Выданне адзначае, што пад санкцыі ЕЗ падпадаюць расейскія нафтавыя кампаніі, аднак застаюцца незакранутымі вытворцы і экспарцёры газу, якія вядуць пастаўкі энерганосьбітаў у многія еўрапейскія краіны. Таксама застаюцца некаторыя паслабленні ў дачыненні да экспарту, прызначанага для расейскай касмічнай прамысловасці і грамадзянскай ядзернай галіны.
Раней Еўразвяз узгадніў новыя санкцыі супраць Расеі, але адклаў іх прыняцце да панядзелка, 8 верасня. Мяркуецца, што пастанова аб санкцыях будзе прынятая з улікам захавання пагаднення аб перамір'і, а таксама ад палітыкі Расеі ў дачыненні да Украіны. Старшыня Еўрапейскага звязу Херман ван Рампей ў нядзелю 7 верасня, заявіў, што Еўразвяз «гатовы перагледзець» пастанову аб увядзенні новых санкцый супраць Расеі, калі ва Украіне будзе выконвацца перамір'е паміж сепаратыстамі і кіеўскімі ўладамі.
Акрамя таго, стала вядома, што ў пашыраны «чорны спіс» Еўразвязу трапяць расейскія чыноўнікі, алігархі, а таксама прадстаўнікі кіраўніцтва Крыма і самаабвешчаных Данецкай і Луганскай народных рэспублік.