Лукашэнка: Слухайце ўсё і дзяліце на 10

Дыктатар распавёў, як стараецца "ўціхамірыць" сітуацыю ва Украіне.

Беларусь зацікаўленая ў тым, каб не было эскалацыі канфлікту ва Украіне, і, наколькі гэта магчыма, "імкнецца ўціхамірыць там сітуацыю".

Пра гэта заявіў Лукашэнка сёння, размаўляючы з работнікамі Менскага вытворчага гарбарнага аб'яднання, размешчанага ў Гатаве, паведамляе карэспандэнт БелТА.

"Ва Украіне ідзе братазабойчая вайна, я ўжо не аднойчы пра гэта казаў. Гэта канкурэнцыя, гэта супрацьстаянне, - адзначыў Лукашэнка -. Вы разумееце, каму гэта выгадна Гэта нам нявыгадна, гэта Украіне нявыгадна, ды і Расеі нявыгадна. Чаму Украіне? Таму што іх людзі гінуць на іх тэрыторыі. Бо гэта дэстабілізуе абстаноўку ва Украіне, гэта не трэба нікому - гэта разбурае ўвесь лад жыцця".

Лукашэнка акцэнтаваў увагу на ролі інфармацыйных войнаў, якія адбываюцца сёння, у тым ліку, ва ўкраінскім канфлікце. "Сёння гэта не тая вайна, што была калісьці, ідзе інфармацыйная вайна. Не бойцеся інфармацыйных войнаў, слухайце ўсе і дзяліце на 10", - сказаў правадыр.

Ён нагадаў, што "супраць Беларусі таксама вялася інфармацыйная вайна. Але мы здолелі выстаяць, таму трэба глядзець спакойна на гэтыя інфармацыйныя войны", заклікаў ён.

Дыктатар разглядае як важны момант, каб украінская сітуацыя не распаўсюджвалася за межы гэтай краіны. Ён таксама падкрэсліў: "Глыбінныя прычыны ўзнікшай ва Украіне сітуацыі - не ў амерыканцах і не ў еўрапейцаў, а ў іх саміх". "Гэта карупцыя, развал улады, бандытызм - усё пачалося адтуль і далей – больш. А калі ўбачылі, што ў цэнтры Еўропы разгараецца канфлікт, тады ўжо пачалі дроўцы падкідваць", - выказаў меркаванне ён.

Ён таксама адзначыў, што Беларусь можа працаваць толькі на мір, каб уціхамірыць там сітуацыю. Лукашэнка запэўніў, што ў Беларусі будзе спакойная сітуацыя: "Калі ў нас у эканоміцы будзе нармальна, калі нашы людзі будуць занятыя справай, тады і мірна будзе ў краіне. Трэба жыць у сваёй краіне і займацца мірнай справай".