Кіраўнік МЗС Літвы сустрэўся з галоўнай рэдактаркай charter97.org

Літва прытрымліваецца прынцыповай пазіцыі ў пытанні парушэнняў правоў чалавека ў Беларусі.

Міністр замежных спраў Літвы Лінас Лінкявічус 8 верасня сустрэўся ў Вільні з галоўнай рэдактаркай сайта charter97.org Наталляй Радзінай.

На сустрэчы абмяркоўвалася сапраўдная сітуацыя ў Беларусі, ціск на незалежныя СМІ, які не спыняецца, спробы беларускіх уладаў блакаваць сайт charter97.org, рэпрэсіі супраць грамадзянскай супольнасці і арышты актывістаў апазіцыі, цяжкае становішча палітычных зняволеных у турмах.

«Трывогу выклікае тое, што апошнім часам пытанне вызвалення вязняў сумлення сышло на другі план, зноў ідзе падлашчванне з дыктатурай, і я звярнулася да міністра замежных спраў Літвы з просьбай надаваць асаблівую ўвагу пытанню вызвалення палітвязняў», - паведаміла Наталля Радзіна.

На сустрэчы таксама абмяркоўвалася сітуацыя ва Украіне і роля Беларусі ў гэтым канфлікце.

На думку Радзінай, Лукашэнка спрабуе выкарыстаць гэтую вайну для таго, каб зноў атрымаць падтрымку Захаду для працягу сваёй рэпрэсіўнай палітыкі.

Міністр замежных спраў Лінас Лінкявічус запэўніў галоўную рэдактарку charter97.org, што Літва прытрымліваецца прынцыповай пазіцыі ў дачыненні да парушэнняў правоў чалавека ў нашай краіне, і патрабаванне вызвалення палітвязняў гучыць на ўсіх сустрэчах з афіцыйнымі асобамі Беларусі.