Вядучая АНТ зладзіла бойку на дарозе

Каліна Вардомская напала на жанчыну за тое, што яе аўтамабіль не прапусцілі ў двары ля дзіцячага садка.

Дарожныя канфлікты ўжо даўно не рэдкасць у нашай краіне. У сацыяльных сетках з зайздроснай рэгулярнасцю з'яўляюцца чарговыя пацверджанні розных «разборак», у якіх пытанне слушнасці раз-пораз развязваецца з ужываннем фізічнай сілы. Сённяшні выпадак не стаў выключэннем. У выніку канфлікту паміж дзвюма жанчынамі адна з іх пацярпела, піша onliner.by.

Маладая жанчына, якая раніцай прывезла сваё дзіця ў садок, на тэрыторыі двара аднаго з жылых кварталаў на пад'ездзе да дзіцячай установы сутыкнулася, здавалася б, з тыповай для раніцы сітуацыяй, калі ў вузкім праездзе двум кіроўцам дастаткова цяжка размінуцца.

«Дзяўчына на чырвоным BMW (як стала вядома, гаворка ідзе аб вядучай тэленавін Каліне Вардомскай) настойліва махала рукой і патрабавала, каб кіроўца Porsche Cayenne адагнала сваё аўто назад, хоць у самой было нашмат больш прасторы для манеўру, - распавёў сведка здарэння. - У той жа час другі аўтамабіль быў, фактычна, ззаду блакаваны іншымі аўтамабілямі, што не давала, нават калі б такое жаданне было, магчымасці саступіць дарогу.

Праз некалькі хвілін бессэнсоўнага чакання дзяўчына на BMW, эмацыйна размахваючы рукамі, выйшла са свайго аўтамабіля і плюнула на капот Porsche. Дачакаўшыся, пакуль кіроўца (у якой у салоне было дзіця) вылезе з аўтамабіля, накінулася на яе, пачаўшы люта біць рукамі і нагамі, раз-пораз выкрыкваючы абразы, сарвала з яе завушніцы, кінула іх на зямлю. Праз некалькі хвілін яна села ў аўто і хутка з'ехала ў невядомым кірунку. Пацярпелая ж дзяўчына на гэты момант стаяла на каленях. Увесь твар быў у сіняках, валасы моцна растрапаныя, на лбе некалькі вялікіх шышак, а з мочак вушэй ішла кроў. Яе дзіця ў гэты час стаяла побач і плакала».

Падчас бойкі адзін з відавочцаў змог выклікаць міліцыю. Цяпер пацярпелая кіроўца Porsche праходзіць медыцынскае абследаванне і здымае пабоі для таго, каб распачаць крымінальную справу.