Менчукоў не пусцілі на «бясплатны» хакей

Квіткі раздалі дырэктарам і прадпрыемствам замест таго, каб пусціць жадаючых.

Чытач charter97.org наважыў падзяліцца сваёй непрыемнай сітуацыяй, з якой давялося сутыкнуцца падчас Каляднага турніру ў хакеі.

«Я не фанат хакея, але, думаю, дай схаджу пасля працы, прабаўлю час. 6 студзеня я быў на матчы Беларусь-Швейцарыя, а 7 студзеня гуляла ў фінале Расея з Беларуссю, гэтага прапускаць было нельга. Перад паходам на матч аблазіў увесь інтэрнэт і знайшоў інфармацыю, што ўваход на ўсе матчы бясплатны.

І вось прыехаў я на Чыжоўка-Арэну а 18.30. Народу было шмат: праходзіў нейкі канцэрт у падтрымку матчу, народ весяліўся, танцаваў.

Я спытаў у людзей што ды як, як заходзіць на гульню, яны пацвердзілі, што ўваход на гульню вольны. Мы занялі чаргу. Стаялі хвілін 20 - і вось людзей сталі запускаць. І тут раптам яны сталі выходзіць... Выходзіць да нас ахоўнік і кажа, маўляў, людзей запускаць не будзе, таму што ўваход на мерапрыемства па запрашальных і квітках. Мы задалі пытанне, маўляў, чаму, у інтэрнэце ж пісалі што уваход вольны. У адказ было, што гэта памылка арганізатараў, яны просяць прабачэння і, маўляў, давайце разыходзьцеся, няма чаго стаяць.

У выніку мы пайшлі шукаць квіткі. Абышлі з усіх бакоў Чыжоўка-Арэну - усе касы зачыненыя... У выніку прыйшлося хакей глядзець на вуліцы з экрана. А 19:30 я зайшоў у будынак Чыжоўка-Арэны і спытаў у аднаго з супрацоўнікаў, маўляў, дзе тут можна дастаць квіткі на матч. Ён адказаў, што квіткоў няма і ў касу яны не паступалі. Добра, бачу дзяўчыну, таксама работніца, падышоў да яе - і яна мне сказала, што квіткоў няма, а запрашэнні раздавалі дырэктарам і прадпрыемствам.

У выніку мы паехалі дадому, так і не надгледзеўшы матч на вуліцы», - распавёў ён.