Навукоўцы: У аптымістаў сэрца ўдвая здаравейшае

Людзі з высокім узроўнем аптымізму ўдвая радзей маюць захворванні сардэчна-сасудзістай сістэмы, чым іх равеснікі-песімісты.

Да такой высновы прыйшлі навукоўцы з Універсітэта штата Ілінойс (ЗША).

У іх даследаванні ўдзельнічалі больш за 5000 чалавек ва ўзросце ад 45 да 84 гадоў. У іх вымяралі такія ключавыя паказчыкі, як артэрыяльны ціск, вагу цела, узровень глюкозы і халестэрыну ў крыві. Улічвалі таксама сістэму іх харчавання, узровень фізічнай нагрузкі і такі фактар, як паленне, піша rg.ru.

Менавіта гэтыя крытэрыі рэкамендуе ўлічваць Амерыканская сардэчная асацыяцыя (АНА) для вызначэння здароўя сэрца. Улічвалі таксама ўзровень іх агульнага стану, у тым ліку іх думкі пра сваё здароўе, і наяўнасць такіх распаўсюджаных сярод пажылых хвароб, як астэаартоз, захворванні печані і нырак. Падыспытных таксама падверглі псіхалагічным тэстам, якія дазваляюць вызначыць іх душэўнае здароўе і ўзровень аптымізму.

Навукоўцаў уразіла тое, што агульны стан здароўя падыспытных быў прама прапарцыйны ўзроўню іх аптымізму. У самых вялікіх аптымістаў стан сэрца і сасудаў быў на 50-75% лепш, а агульны стан здароўя - на 55 працэнтаў вышэй за тых, хто прытрымліваўся песімістычных поглядаў на жыццё. "Сувязь паміж узроўнем аптымізму і станам сэрца была нават болей відавочнай, чым залежнасць здароўя ад такіх сацыяльна-дэмаграфічных паказчыкаў, як узрост, нацыянальнасць, узровень адукацыі або становішча ў грамадстве", - пракаментавала вынікі даследавання ягоная кіраўніца прафесар Разальба Эрнандэс.